Aflevering 126

Kandidatuur Bosma

Fuj, ’t is mi-j net effenties te benauwd umme an et wark te muttn mar veuruit.
Umme gien praot te kriegn da-k miskien wel an et loopn eslaagn waare in Nijmeegn of de fietsvierdaagse edaon had en compleet over de toern belandt zol weezn in bedde, toch mar de column veur elkaare zien te kriegn vandaage.
Nee, ik hebbe dus niet efietst en hebbe gien stap meer ezet dan neudig. Enkelt in de skaduw onder de boome. Wat dommeln en wat leezn an reclaameblaagies. Varder et hoogstneudige wat mos, mar varder ok niet meer dan dat! Veural niet meer en Lub mos dan ok niet ankoomn drietn mit ien of aander klussien of karwi-jgien want Lambert was niet veuruut te braandn mit disse warmte.

En mit de reclaame valt mien ooge tuurlijk op de gegaadigdn van et burgerskap. Twintig liefhebbers, da’s niet gek, zol er wel meer weetn mar die hebt bliekbar gien trek in disse functie.
Ik weete dat ik mi-j weer op gevaorlijk ies beviene want mien menink is nogal uutgespreukn en dat gef de burger weer stof tot. En mit disse hitte kan et verrekte stoemn dus menig stof kan opwei-jn as ik de beerputte weer ies löstrekke.
Ach, een naame he-k toch al: of ik bin een olde olderwetse keerl die niks van modarne toestaandn mut emm of ik wörre de koomde tied uut-emaakt veur een vieze olde modarne keerl die gek is op een jong en fris blaagien.

Mar ak toch een menink zol muttn of moogn geemn richtink de kandidaatskap van een burgervader, dan gao ik dit keer toch veur de burgermoeder. Doet mi-j mar ies wat aanders, doet mi-j mar ies een vrouwe an et stuur.
Zo’n mooi mokkeltien, die goed veur de dag kump en mit zo’n kettink op de börst een prachtig ‘boegbeeld’ zol weezn veur onze gemiente.
Want zeg nou zölf: wat emm wi-j nou liever? Een pittige tante of fantast Theo Luutn? Vul zölf mar in…beter een ontembaar wieffien dan een op hol geslaagn praotiesmaker van een Theo. Ik mos er toch niet an denkn as tie de bestuurshamer onder zich had! Man, et is al sinds tiedn da-k denke dat et op bestuursniveau an alle kaantn hapert, dus wat zolln wi-j as burgers toch wel niet veur een bestuur kriegn as Theo de touwgies ies wat antrök of zol laotn viern in dit geval.
Zien bedoeligge is goed umme de ambtenaarn warkelijk an et wark te kriegn mar praktisch gezien bink nogal bange dat et dweiln is mit de kraane oopn. Gien enkele ambtenaar wet een vörke of skuppe te hanteern en gien enkele ambtenaar zit te wachtn op gruun of zwart tussn zien nagels. Allennig al dat gepeuter an et bureau nao gedaone arbeid…zo kump er nooit meer een dossier uut die la. Dan bliemn de vergunningn helemaole achterwege en kriek nooit meer die anvraoge gedaon.
Theo, ie kunt mooi lu… praotn mar die teambuildink zie-k veuralsnog niet zittn. En die kostnbesparink al helemaolt niet. Want weet ie wel dat een ambtenaar degelijk spul in haandn wil emm, as tie dat al wil emm? Gien simpel klauwgien of harkien van de gamma, nee een echte kwaliteits gardena of een handbestuurbare elektrische heggeskeere in plaase van een markloos knippertien. En daor gaon onze centn weer, hup an een ik weet niet hoeveule tuungereedskap.

Theo, ie kunt vriendties willn wordn mit Geert mar bespaart oe toch de muui-jte! Laot nou gewoon Margreet Bosma burgermoeder wördn en wi-j praot narns meer over. Ze wet van wantn, is kordaat, pittig gebekt, hef verstaand van veule tuunonderholt, kortumme…een mooi boegbeeld veur onze christelijke gemiente. Kump er metiene weer wat gruun van et CDA deur. Ik bin er dus wel uut mit de kandidatuur. Wi-j mut mit disse warmte niet zo muui-lijk doen, gewoon kiezn mit die hap en al dit gewauwel van al die aandere briemn, in de container en an de weg ermit. Klaor, aof-ewarkt. Zo muj er mit an!!

Dus begun vollnd jaor emm wi-j een burgermoeder an top en dan zal er ies mit die veurzittershamer emept wordn. Wi-j telt de daagn aof, eindelijk zal Zwartewaterlaand bestuurt en regeert wordn. Eindelijk kump er skot in de chaos en bende. De anvraogn vliegt de deure uut en de bouwvergunningn ritsn er dagelijks mit bossies deur, richtink briemnbusse.
Mensn, waor wachtn wi-j nog op, leve de vrouwluu, leve de modarne geemancipeerde saamnlevink en leve de terugkeernde politieke christelijke parti-je van Burgermoeder Bosma.

Lambert