Aflevering 203

Helder as een klontien

Een mense is van neture ni-jskierig ann-elegd. De iene wat meer dan de aander mar in principe is iederiene vaake wel beni-jd of belangstellnd in aandermans zaakn. Wat mi-j zellef nogal mateloos boeit, dat bin die ni-jsberichies uut de regionale kraanties.

Die kȍrte advertenties mit tekstn waoraj dan een persoon uut mut herkenn. Of van die fotoogies van jaorn her, umdat de persoon in kwestie Abraham of Sarah binnkȍrt zal zien. Dan stuurn van die grappige femilieleedn of vriendn een nogal belachelijke foto naor de kraante en dan is et an de lezer um mar weer uut te zuukn wie dat nou kan weezn. Dan kank uurn zittn tuurn of ik iets kan viendn an gelaotstrekkn die et kereltien of deerntien van bijna vieftig jaor terugge nog steeds vertoont. Sproetn, wilde bos haor, ontbeugelde taandn of een brillegien, alles mit mekaare ma-k et een sudoku van jewelste: zuuk mar uut wie dit keer jaorig is. Soms bin er ok van die trouwfoto’s die as iederiene zo’n beetien uut die tied bezit. Ik zellef ok namelijk. Dan mos ie nog naor de fotograaf en stun ie veur zo’n hekkien mit een gedientien. Alle trouwfoto’s uut die tied emm dezelfde achtergrond, dezelfde stand van de poppegies en etzelfde stukkien hangnde stof. De vrouwe in keurig creme kleurig uutstaond jurkien mit hoepeltien en kant eronder en de man in pak en hoge hoed onder de arm. Ie kunt oe veurstelln dat et een gepuzzel van niks is as bi-j zo’n advertentie gien naamn staon.

Naost disse berichies, bint er ok nog ies de berichtn van een zoveul jaorige inwoner van Zwartewaterlaand, die iets edaon hef of juust niks edaon hef. Mit initiaaln koom ie vaake iets wieder mar niet veule, angezien hallef Gellemuudn, Hasselt en de Sluus een tal van femilieleedn mit dezelfde achternaame bezit. Weer een gezuuk van niks. An ons de eer umme weer te denkn wie wat op zien karfstok hef want een mense blef gezond beni-jd en gezond ni-jskierig. En een kraante muj goed leezn, niet hallef gebakkn toch?

Zo stund er vandaage weer een stukkien in over een 44 jaorige inwoner uut Zwartsluus. Getrakteerd op een boete van zo’n 2.000 euro veur een dieseltank die verkeerd weg-ehaald zol weezn. Uut et stukkien kaank zo wel ien en aander herleidn mar ja zeker weetn doe ik et netuurlijk niet. En dan kaank wel mien lichtn overal her en der opdoen, de vuulsprietn uutzettn en bi-j alle hangplekkn mien oore te luster leggn, mar dat wil een mense niet. Net zolaange voogeln totdat er ien iemaand overblef die an alle veurwaardn voldȍt qua beskriefink, is des te mooier en dat voldȍt ok veule meer dan direct via via de juuste naame al te pakkn te emm. Niks is mooier dan tergend laangzaam te wark te gaon en tot de ontkneuping te koomn. Dat gef de mieste voldoenink. De kroon op al et speurwark.

Ik bliefe dus gewoon nog effn flink naodenkn, puuzeln en passn en meetn. Ik koome er wel uut.

En in de tussntied puuzeln ze op et gemientehuus of et museum in de Sluus nou wel of niet bestemd kan wȍrdn veur de meziekverienigink Veurwaarts. Et lek mi-j niet zo muu-jlijk, teminste laange niet zo muu-jlijk as een persoon opzuukn die an een beskrievink mut voldoen. Et is zo helder as een klontien: een leegstaond pand, beetien vri-jstaond van mede bewoners die miskien minder behoefte emm an lewaai an de kop in de aomp-uurn. Een ideaal geleegn plekkien, eegn onderkoomn en eegn ruumte veur opslag en meziekinstrumentn. Gien opgeruum nao elke repetitie umdat et honk eigenlijk een gedielte van een skoele is. En een leeg paand kost onderhold in de loop van de tied. Klaor, da’s dan op-elȍst…Veurwaarts kan nao de vekansie zien eegn thuushonk inrichtn en verhuuzn richtink Zomerdiek. Dat kostte weinig zwietdruppelties, gewoon logisch denkn, een gave veur een geboorn onderzuuker. Mien zeegn hei-j en as et mut, dan wi-k de gemiente hierover wel berichtn.

Dan nog ien probleem: et veurmalig stadhuus in Gellemuudn. Vollnde weeke kump et verlossnde antwoord wat hiermit gebeurn gaot. Wi-j wachtn in spannink aof. Want iederiene is van oorspronk en neture barre ni-jskierig ann-elegd, toch? Kan wel een hint geemn mar zellef oplossn gef meer voldoenink. Dus gemiente…doet oen best en bouw de spanning nog eem op veur ons! Ik leese et wel weer in de kraanties.