Donderdag 23.05.13 | 16.53 uur

RSS | Mobiel | Laatste 24 uur | Tip de redactie| | |

Aflevering 204

Hasselt is dus vies?!

Hoe varre mut een burgemeester gaon umme een stad skoone te kriegn? Aj zȍlfs al advertenties muttn plaatsn veur skoonmakers, dan stoj toch wel genomineerd as smerigste stad van Overiessel. Miskien wel een goeie teegnhanger van et leukste dȍrp van Overiessel.

Hasselt is dus vies. Te vies umme gastn en toeristn te ontvangen. En toen zag Eddy de bu-jje hangn: binnkȍrt Hassailt en dan een smerige rotzooi en bende overal, dat is totaal gien reclame! Mar umme de boel nou te gaon opleukn, zet ik mien vraogteekns. Want de iene zien opleukeri-je is niet de aandere. As ik an et oppimpn gao, dan zal mien buurman dat absoluut niet waardeern, dat weet ik al wel. En et opleukn van de jeugdige Hasselters is vaste niet etzelfde as de oldere garde.

Bi-j opleukn denk ik opk meer an dat soort van graffiti wat aj overal op de muurn zien. En dat zal Eddy vȍstig niet bedoeln. Warskeinlijk mut die bende juust van de muurn aof in plaatse van erop.

Ik bin trouwns wel ieuwigste beni-jd hoeveule mensn in touw koomn en zich opgeemn veur een vri-jwillige bi-jdraage. Ik kenne weinig mensn die veur niks de haandn uut de mouwn willn steekn as et umme skoonmaakn gaot. Stao zȍlf ok niet direct mit de neuse veuran. D’r is gewoon niks an en et is vaake zo weinig waarderingsvol. Dat heur ie tal van huusmoeders altied zeggn. Ze gaon vaake mar een bi-jbaantien zuukn umdat de rest van et gezin hun skoonmaakwoede vaak weinig opmarkt en waardeert. En ieder mense wil graag lof en eer veur gedaone arbeid. Of dat nou in de vȍrm van loonsverhoging of een bos bloemn is, dat mak niet uut mar men wil wel gewaardeerd wȍrdn.

Dus ik bin beni-jd wat Eddy bedacht hef an bedaank materiaal. En eervolle vermeldink in de 3 watersteedn? Op de veurpagina, de beste skoonmaakster of skoonmaker van steeg nr 6. Gewaapend mit soppnde emmer en een bȍrstel stoj dan te pronkn zoaj nog nooit epronkt emm. Glimmnd van de inspannink en trots. Zo’n erepodium mit drie plekkn veur de allerskoonste, de skoonste en de darderangs skoonste. Zo’n sjerp umme mit super skoonmaker van Hasselt 2012. Nou, daor koom ie nog ies mee tuus. Kuj nog beter de BOB weezn.

En aj niet uutkiekt, kump zo’n actie straks elk jaor weer, of elk kwartaal. Want is Hasselt dan wel skoone genog uume et W.G. van der Hulstfestival te viern? Mut dan niet argens sni-j eskeumn wȍrdn? De mensn bin teegnswoordig nogal egoïstisch en te beroerd umme et padtien van de buurn te veegn, laot staon een hele steege!

Of straks dat stadsontbijt. Wie ruumt de bende weer op? Meestal de horeca of de ȍrganisatie, mar as dan ok ies gewoon iederiene zien eegn rommel opruumt, dan zol zo’n stadsskoonmaak toch niet neudig hoemn te weezn? En dat is gewoon nog mar simpel. Ie pakt zo’n plastic zak, (destieds geïntroduceerd deur wijlen Marinus van de Velde) en ie gooit oen eegn bestek, beker en aandere gebruukte veurwarpn erin en klaor is Hasselt.

Et zol toch in feite niet neudig muttn weezn dat een burgemeester een oproep mut doen in de kraante umme de stad skoone te kriegn? En dȍt de gemienteraod zȍlf ok mit? Is de eerste aoftrap van alle parsoneelsleedn, of kiekn die mit de haandn over mekaare toe hoe men leg te zwoegn en te zwietn? Of staon ze mit de camera’s ien en aander vaste te leegn umme de site op te leukn mit stadsvollek dat al onkruudwiedende gevloerd leg? Of gaon ze mit een koffiekarregien rond deur Hasselt veur et schrobbnde volk? Dȍt mi-j dan metiene weer denkn an de Charles Dickens tied.

Ik vrees mit grote vreze dat burgemeester en wetholders snel weer achter et bureau kroepn umme snel bezig te gaon mit et varder ontwikkeln van de centrumplann. Een startsein geemn is toch gauw gebeurd en daornao kuj oe gewoon terugge trekkn tot de klus eklaard is. De winnaar bekend maakn, een lintien uutdieln en daornao nog eem mit collega’s naobȍrreln.

Mocht ie interesse emm veur disse skoonmaakacite dan kuj oe nog steeds opgeemn via et telefoonnummer wat in de kraante staot. Graag emmer en sponse mitneemn. Water hoeft niet want et wil toch de hele dag hard reegn. En as de boel edaon is, mag ie wat mi-j betreft gerust varder skoone maakn bi-j mi-j. Hebbe ok nog wel ien en aander klussien liggn en onkruud is ter altied genog. Daor heur ie mi-j niet over klaagn. Veur een uutgebri-jdere lieste mit taakn bi-j van harte welkom op mien huus adres.

Lambert.

Tja, Lambert, de kans is inderdaad niet zo groot dat iedereen als een gek gaat zitten poetsen. Toch is het niet onmogelijk! Een jaar of wat geleden zag ik toch echt een stelletje Sluzigers (o.a. keetjeugd!), aangevuld met enkele andere Zwartewaterland(st)ers en zelfs een kersverse burgemeester Hofland de Kolksluus schoomaken! Mede gestimuleerd door positieve stukjes van Jan Blei e.d. in dit medium. Dus het kán wel! Een stiumulans voor de eigen verantwoordelijkheid in deze tijden van bezuinigingen om onze gemeenschap mooi en leefbaar te houden, vind ik heel goed. Als Eddy nu net als Arco toendertijd ook nog de bezem pakt met een ludieke actie, zal hij nog meer worden gewaardeerd als nu al gebeurt! (cynisme leidt tot niets doen, misschien is het naïef maar ik hou van een positieve stimulans en daarvoor heb jij ook een machtig wapen op deze site) Groetn uut Gellemuun!