Aflevering 205

'Eddy, wat kan er nog misgaon?'

Kraantn en aandere ni-jsboodes binn krachtige en machtige waapns umme altied iets veur elkaare te kriegn. Ie hoeft mar iets te skriemn dat iets verleurn gaot weegns gebrek an baatn en metiene is er ien of aandere sponsor die reageert en et teleurgaonde dink red van disse ondergaank. Zo is de Kaamper Steur ered van een verdrinkingsdood. De trots van Kaampn zol op de schroothoop belaandn umdat et niet financieel meer te behappn was umme dat biest skoone te holln. En voila: de vollnde dag is de vis weer duur betaald. Mit daank aan de betreffnde gulle geld toe-skieter!

Ik vraoge mi-j dan ok aof of zuks niet een expresse pogink is umme succes te boekn. Want iederiene kan op zien vingertoppn wel naogaon, dat er dan eindelijk iemaand in actie kump. Meestal is dat niet umme et verleurnde te beholldn mar meer umme de verdiende lofpriezink die ontstaot deur de toevallig per ongeluk genuumde naame van de gever. Want wie wil nou niet de hemel in-epreezn wȍrdn deur zo’n geweldige daod? Niks is mooier dan een dikke veere in de konte. Ereburger van 2012 weegns zienm of heur succesvolle gift.

En lest nog: Veurwaarts kampt miot probleemn veur huusvesting en een weeke later: bingo! Huusvestink is gerealiseerd. Dat zol nooit elukt weezn as er gien stukkien in een reclameblaagien verskeenn zol weezn. En as een columnist er dan ok nog ies op in zol haokn, dan koomn er mooie dingn tot staand. Want ok een columnist kan veule bereikn via zien stukkies. Een gevaorlukke opmarking kan soms er toch toe leidn dat iemaand an et denkn ezet kan wȍrdn. En dat kan dan resulteern in een totstaandkomink van een zȍlfs braandskoon Hasselt! Waor menigeen de neuse veur ophaalt, zet nou de hele stad op de kop umme mi-j deur de neusgaatn te boorn dat mensn vri-jwillig en gratis veur een burgemeester de bienn uut et lief rent. Dat is gewoonweg prachtig toch?

En nou an mi-j de eer umme diezelfde burgemeester zelf ies an et wark te zien kriegn. Daor is Lambert de angeweezn persoon veur bliekbar. Mar ie mut netuurlijk niet vergeetn dat een burgemeester er tiptop uut mut zien, zien geweldigste glimlach mut toonn en dat zien haor keurig in de plooi eruut dient te zien. Dat kost een vermoogn an tied elke mȍrn want gao er zelf mar ies anstaon umme et spullegien zo vetglad achterover te kriegn zonder een spiere de aandere kaante op te emm. Niet iederiene slap zonder zich dartig keer umme te woeln toch. Ok een burgemeester woelt vanwege kopzȍrgn umtrend zien stadties. Dan stoj de vollnd mȍrn op mit een barstende koppiene en et haor alle kaantn op. Geleuft mi-j mar dat dat minstens een uure kost umme mit een pot gel alles strak te kammn. En veur een straalnde glimlach hei-j een goed verzȍrgd gebit neudig en ok dat kost pien en muu-jte. Poetsn, raagn en flossn en spuuln mit mondwater en weet ik veule wat nog meer, umme die blinknd witte straalnde uutkiek te bemachtign. Ie bint immers et visiteplaatien. Bi-j dit alles heurt een keurig gesteevnd en gestoomd pak. Dat mag absoluut niet vies wȍrdn, want een berispelijk vlekkien dȍt afbreuk an al die aandere veurzȍrgsmaatreegels umme goed veur de dag te koomn. Een goed verzȍrgd voete, wekelijks deur een pedicure behandeld dȍt een burgemeester op wolkies loopn en veurkomt eksteroogn en likdoorns die belemmern umme bliede en vrolijk te weezn aj een stap in de goeie richtink zettn.

Al mit al dus concludeernd dat een burgemeester mit dit alles al enȍrm veule tied kwiet is an persoonlijke verzȍrgink. Dan emm wi-j et nog niet iens over eetn kookn, wassn en striekn. En al helemaole niet umme zien eegn tuuntien te wiedn. Gelukkig is zien grȍs altied nog weer gruuner dan de buurn, dus daor hoemn wi-j ons dan ok gien zȍrgn over te maakn. Wel dat er een enkel keertien ies een meiertien overhenne mut. Mar ach, een oproep in een plaatselijk kraantien verhelpt dit probleem dan wel weer. Metiene belt Jan en alleman uut Hasselt dat ze wel wat extra tied over emm umme een drok bezet man te helpn an een mooi strak gezon. En ik zol mi-j ok niet verbaazn dat er een huusholster over de vloere kump. Zo warkt dat toch bi-j een allent staonde man?

Dat lat niet weg umme toch zȍlf ies mit een bessem in de haand et veurtouw te neemn bi-j een ludieke actie veur skoon skip in Hassailt. Mooi en aordig umme et volk op de bien te kriegn mar nog mooier umme de vloere an te veegn mit oen eegn bessempien. Kan nooit kwaod veur wat persoonlijkere sympathie. Ie kriegt zo’n aostaand aj de wettn veurleezn en er zȍlf niet naor handeln. Nogmaals hef een burgemeester een status mar aj effn van dat standbeeld aof stappn kriej meer waarderink en een warm onthaal van de joelnde menigte.

“Ach Eddy, wat kan er nog misgaon?” Et bin oen eegn woordn dus gewoon probeern zok zeggn en kiekn wat happns! Een 'evenement' waor wi-j alln naor uutkiekn, net as Hassailt.

Lambert.