Maandag 20.11.17 | 00.03 uur

Aflevering 308

Platte karre uit de gratie...

Zolaank et goed gaot, gaot et goed. Da’s effn een lastige hé? Mar zo is et wel. Gaot alles vollns plan, dan heur ie er niemaand over! Er wördt zölfs niet iens over nao-edacht wat goed gaot of miskien ooit wel niet goed kan gaon. Men döt et gewoon, zonder naodenkn. En ’t is al gebeurd veur men er arg in hef.

Ik zal ies een veurbeeld geemn. Disse olde keerl zat ooit vrogger, rond et jaorfeest, op een skoele karre. Et ultieme feestelijke uuttien van alle jeugdign die ons dörp lief was. Zowel de hervörmdn, de oopnbaarn en de gereformeerdn!! De hele santemekraam op de skoele karre. En was et niet te holln, dan werd er nog een karre ann-ekoppeld en hoppa…nog meer kiender harbargn.

De optocht gunk over bargn en deur daaln. Wi-j waarn tiedn onderweg en argens in een bos werd estopt en kreegn wi-j drinkn en laten nog ies een likkertien. Man…wat een genot en wat een plezier haddn wi-j daor op die karre. Een hele belevenis in die tied, et maakte zo’n indruk op een kiend van rond de achte! Aj mi-j vraogt hoe ak verkleed waare, dan kaank et overhempien nog uut-teekn! Had mien moe zelf enei-jd overigens.

Disse traditie hef jaornlaank staand eholln mar is toen een keer aof-eskaft. Waorumme weet ik niet iens, mar de karrn bleemn wel gebruukt veur et Pinksterriedn. Dus nao de skoele tied gungn wi-j in feite gewoon varder rond de Pinkstern. Zölfde opzet, zölfde jongn en zölfde vaders die de trekkers reedn. En daor gungn wi-j weer henne, opni-j de bossn in, drinkn, plassn en weer varder tuffn.

Niemaand die ooit erbi-j naodacht dat et miskien wel onverantwoord was mit zoveule op iene karre, want wi-j zaatn mit minstens een dikke 20 tot 25 kiender op zo’n dink! Zo gunk et gewoon, et was traditie en et gunk altied goed, niks an de haand…

En dan gaot et een keer fout: de karre slat umme mit een stellegien feestnde mensn erop. Iniens begunt bi-j iederiene de alarmbelln te rinkeln!! Oh, help…wat onveilig,onverantwoord en… wat?? gien vergunnink?? Never nooit niet meer! Dit overkump ons nooit weer. Aof-eloopn, over en uut!!

Nou wil et geval dat wi-j hier in een stukkien Neederlaand woonn en leemn waor de platte karre een nogal prominente plekke innemp bi-j de miestn. De meeste dörpies hier in disse umgevink hef de karre in hoog vaandel wat betreft optochtn en aandere feestn. Ik hoefe mar et woord corso te nuumn en gigantische bouwwarkn verskienn ten tonele waor dörpsgenootn kilometers hooge plaatsneemn op een stukkien iezerdraod bedekt mit wat dahlia’s. Ok onveilig en onverantwoord??

Ja, in feite wel, want et gaot net zolaank goed tot et fout gaot. Mar wi-j doet et en wi-j bint er allemaole bi-j en kiekn ernaor. Deur nauwe straoties, skarpe bochtn, veule volk bi-j et pad en steeds hogere creaties. Argens is de top bereikt mar et blef nog steeds goed gaon…

Zeg et mar…wat is wijsheid? Gaon dus kampioenn van de voetbalclub binnkört wel of niet een rondrit maakn op een platte karre? Wel of niet huldign op disse al olde traditionele meniere of in een airconditioning bussien keurig achter et raampien?

As mien jeugdige bloed dan nog ies effen lekker stroomn mag , dan druis ik teegn alle regels in umme de platte karre tommiet uut de skuure te haaln en et hele zwikkien an gegadigdn erop te laadn en rond te riedn deur Zwartewaterlaand. Over bargn en deur diepe daaln…koeln en drumpels, dwars deur et weilaand van de boern en weer terugge. Een plas- en pitstop, mit of zonder boete riskerend en dan mit een dikke magnum in de snufferd weer richtink huus tuffn.

Olde tiedn laotn herleevn! Er valt veul te zeggn over riskante activiteitn. An veule zit gevaor en ongenadige risico’s. Mar et hele leemn is ien en al risico!! Ik weete nog niet iens of ik mörn nog wel weer wakker wörde en of ik veilig op de fietse bi-j mien visboer koomn kan. Of ik niet ziek wörde deur et eetn van een niet goed gebakkn skollegien. Of ik gien ien of aandere patjakker teegn koome die mit opgevoerde brommer mi-j van de sokkn red. Of ik gien hartverzakking kriege van et overweegn en piekern wat een mense dagelijks döt.

Wel dan… Laot mi-j dan mar in et harnas starmn, desnoods in, mien moe heur eegn gemaakte overhempien, in een holtn kissien mar wél op een platte karre richtink de begraafplaase.

Lambert

reageren REAGEER | stuur door DOORSTUREN | printen PRINT | DONDERDAG, 11.05.17
Vandaag:
6° | 2°
Meer weer...
Morgen:
8° | 2°


LIVE SPORT
DESZ 1 - Omlandia 1 2-0
HSV De Zuidvogels - Sc Genemuiden 1 0-6
Swift'64 1 - Olympia'28 1 3-1
AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.24668 s