Donderdag 19.10.17 | 18.41 uur

Aflevering 311

Ik vertrekke

Sommige mensn kunn mi-j onderhaand wel skietn. Ze kunt mi-j wel wegkiekn. As Lambert mar ies een keertien ophoepelde, fut gunk! Man…dat zol een hele opluchtink weezn. En ik weete dat, want ik heure et namelijk geregeld. De iene keer anoniem en lest een keer iene mit de naame erbi-j. Dat stelde ik eigenlijk zeer op pries want ik holle van eerlijke mensn, die et lef emm mi-j recht toe recht an, liek in de snufferd de waorheid durvn te vertelln.

Mar ja, Lambert gaot niet fut, Marjolein gaot fut. Dat was veur mi-j zölfs slikkn! Een powervrouwe, of wat men ok mar mag viendn, zie is inderdaod niet veur niks een Greveling!! Dat bint de mensn waor de creaties en inspiraties er zo uutfladdern. Ze kriegt een ingevink en de haanden, de mond en alles wat ze hebt an meugelijkheedn, weetn et te vörmn en te vörmgeemn. Onveurstelbaar, de gekste en de onmeugelijkste dingn he-k al eziene an bloemnpracht van pa Greveling. Zie hef et dus niet van een vremde.

Iets zien in iets wat niks is. Da’s een hele kunst toch? Iets maakn van niks, zie dat maar ies veur elkaar te kriegn. Pa drei-jt er zien haanden niet veur umme en tovert bi-j elke geleegnheid die zich veurdöt, een bloemncorso in et klein in een karke, op een plein, in zien Zintuugntuun of gewoon as kedoogien bi-j een aofskeid.

Marjolein haalt mi-j vaake de woordn uut de mond. Nou bink ok gien praoter mar zie is er veur geboorn! Ooit was zie in de Sluus in et Botterhuus. Een grote kienderskare umme heur hen. En mar vertelln en uutbeeldn. Ik stunne buutn naor et water te kiekn en keek af en toe deur et raampien en zaage glundernde koppies, doemn in de mond mit of zonder knuffels en in een fantasiewereld belaandde kiender. Zie had ze warkelijk betoverd, zie zaatn er nog wel mar ok weer niet.

Marjolein gaot dus fut. Weg bi-j heur roots, heur dörp, heur belevingswereld die onze belevingswereld mocht wordn. Dus niet allennig Marjolein verhuusd, in feite verhuuzn wi-j allemaole mit! Over een maond beleemn wi-j de wereld van Amerika. Dan waann wi-j ons in de eerappels. Marjolein stampt et er ons wel in. En zo niet, in gepureerde vörm smaakn mi-j heur verhaaln ok best. Ik zoege ze zo op! Ik zoege ze zo naor binn!

En pa Greveling…tja, pa blef hier. Die mut zien eegn onkruud bliemn wiedn. Zien eegn boonties doppn. Dat is em wel toevertrouwd mar ’t is wel wat kalere grond zeg mar. Verrekte kaal. Gezelligheid, koffie en lekker een ende fut praotn…tja dat gaot nou via et skarmpien. Niks lijfelijks kump er meer an te passe. Alles op aofstaand. Da’s opni-j slikkn. As een eerappel zonder sju, zo verrekte dreuge in de mond. Mit een wrang nao-smaakien. Niet te proemn!

Albert, ik weete daj mi-j niet zo maagn. Ie bint er ok vri-j eerlijk in en dat staot oe te priezn. Mar dit is niet gemakkelijk, gien Marjolein meer in de buurte. Ie hebt heur een beetien teveule an goeie uutvoernde meugelijkheedn mitegeumn. Zie barst ervan en nou explodeert zie en gaot heur ideaaln tegemoet, heur grenzn uutbreidn.

Marjolein, ik gao oen columns op de letter nauwkeurig mit al mien eerappelklikkies naor binn warkn! Ik verheuge mi-j no al op de eerste oogst, de eerste bi-j-ien geschrapte gaarkeukn an vertellegies. Oen eigengeheime eigenheimers.

Marjolein, goed gaon, bakt ze daor mar flink bruun, mit een riekelijke fantasie-laoge sju er overhenne. Dan koomn de mooiste verhaaln tot staand!

En wi-j zult mi-j dan toch weer smulln!!

Lambert

reageren REAGEER | stuur door DOORSTUREN | printen PRINT | WOENSDAG, 19.07.17
Lambert,

Wat een lieve woorden! En als je een keer een lekker stampotje of geprakte aardappelen in
Amerika wilt eten, dan kom je maar eens gezellig langs hoor! Stukkie vliegen, dat is alles wat je ervoor moet doen 😀 Ik blijf jou ook volgen hoor, via de Zwartewaterkrant - ik moet mijn moers taal toch blijven ervaren en jouw lekker pittige opmerkingen gaan er bij mij wel in en zorgen voor gezellige discussies altijd met mijn pa 👍🏼
Marjolein | Sint Jansklooster | MAANDAG, 24.07.17 | 21.44 UUR | Kwetsend of ongepast?
Vandaag:
19° | 11°
Meer weer...
Morgen:
14° | 9°


AGENDA
  • Donderdag 19.10.17
  • Vrijdag 20.10.17
  • Zaterdag 21.10.17
  • Zondag 22.10.17
  • Maandag 23.10.17
  • Dinsdag 24.10.17
  • Woensdag 25.10.17
  • Volledige agenda...
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.74778 s vps1