Zaterdag 18.11.17 | 22.06 uur

Aflevering 312

Gemientelijke belastingn

Da’s niet zo mooi, da’s helemaole niet zo mooi! Dat gaot ons mit mekaare flink geld kosten! En de gemientelijke belastingn bint al zo hooge. Elke keer denk ik dat er wel ies een mitvaller zal weezn mar die tied ligt varre achter ons.

Welke idioot hef die ruutn op et gemientehuus in-egooid? Welke verrekte idioot?? Ie hebt niet allennig de ruutn van et gemientehuus in-egooid mar ok die van ons as burgers!! Denk mar niet dat de gemiente dat zölf gaot betaaln! Dat gaot naor ons allemaole via een verhogink van plaatselijke onveurziene uutgaavn. Weer vief euro per maond erbi-j.

Sommige mensn bint ok zo ieuwige dom!! Denkt toch eerst ies nao veur aj vernielingn anricht. En aj dan zo neudig wat wilt vernieln, doe et dan bi-j oen va en moe in de tuun of zo. Mar niet op een gemientelijk iets. Da’s toch vraogn umme muui-jlijkheedn of niet dan? Ze koomn er echt wel achter heur, ie of jullie bint eziene. Dat lukt niet ongemarkt. Argens op een camera is wel wat te ontleedn en of hond uutlaoter in de nachtelijke uurn die iets op-emarkt hef.

En wat mankeert eran umme de ruutn in te gooi-jn? Dat kon niet via een gesprek of zo? Dat mos mit donder en geweld? Gewoon een beetien behoorlijk kwaod op Bilder of op de pliesie of op Bert Leistra? Tja, ze et maar, er zit momenteel zoveule gehuusvest in et gemientehuus. Of mos ie te lange wachtn mit oen nummertien in de hal en bi-j gefrustreerd weg-eloopn umme et later via et raam ies te probeern?

Ja, tis wat, aj oen frustraties niet meer in de haand emm. Daj buutn zinn raakt en metiene de eerste de beste stien die er leg gebruukt, umme flink wat schade an te richtn.

Dus vertel ies an ome Lambert: wat zit oe of jullie dwars? Ik bin een olde keerl mit toch wel iets meer leems-ervarink en wat mensnkennis, wat is ter loos? Bi-j et niet iens met de gemiente of hef Bert oen huus niet op tied verkocht en zit ie mit twee hypotheekn? Hef de pliesie niet snel genog in-egreepn toen aj beldn? Veur wie was et zooigien stienn bedoeld?

Ik wil best wat bemiddeln. Ik kenne de miestn op et gemientehuus wel. Niet da-k ze dagelijks spreeke mar ik weet wel zo onderhaand hoe en wat er veur spul rondlöp en hoe die te benaadern valt. Gelieke mit de deur en et raam in huus valln, liekt mi-j gewoon niet de oplossink. Et kan echt wel via een andere ingaank. Daor bink van overtuugt.

En miskien zit ik er wel finaol naost en was et niks persoonlijks. Waar ie of jullie flink bezeupn en haj te diepe in et glaassien ekeekn. En glas is glas, heel of gebreukn. Allennig is een bierglaassien makkelijker te vervangn dan zo’n hele ruute in een gebouw.

Nou is et niet enkel disse vernieligge, mit et Euifeest is ok al ien en aander eran egaon. Lanteernpaoln, effn een skuttingien kapot rammn, wat aandere toestaandn die deur et kapotte lanteernlichien niet meer waor eneumn is. Beetien duuster allemaole…

Maarre…ome Lambert hef zien zeggien edaon. Veurdat ze op et gemientehuus er weer wat warmpies bi-jzittn heb ik de pörtemennee alweer muttn trekkn. Veurlopig muttn ze et miskien mit laandbouwplastic doen want dat holt de harfst nog ienigszins buutn de deure en et raamkozien.

Burgervader Bilder, weest een man…treedt heldhaftig op! Gooit oen eegn glazn niet in!

Staot op oen streepn, en zörg veur de oopnbare orde, veiligheid en de onderdanigheid van oen volk.

Ontzag veur de wet! ontzag veur et gemientelijk belang!

Lambert

reageren REAGEER | stuur door DOORSTUREN | printen PRINT | DINSDAG, 12.09.17
Vandaag:
7° | 1°
Meer weer...
Morgen:
6° | 2°


LIVE SPORT
DESZ 1 - Omlandia 1 2-0
Buitenpost 1 - Sc Genemuiden 1 0-2
Swift'64 1 - Olympia'28 1 3-1
AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.2483 s