Zaterdag 21.10.17 | 16.40 uur

Aflevering 314

De briede en de smalle weg

Ik bin machtig eegnwies. Koppig, hardnekkig en veural vaste holdnd an zoak et altied doe. Dit keer miskien toch niet zo’n denderend goed plan ewest.

Ik begaafe mi-j op weg naor Gellemuudn. Op de fietse. En zo aj weetn leidt de weg daorhen langs twee weegn, de zoegehietn briede en smalle weg. Dat gef in principe niks, aj dr mar komt.

En angezien ik van de olde stempel bin en dat graag zo holle, fiets ik van oldsher immer nog dezelfde route en dat is dus onderlaangs via de rechterkaante, exactement: de smalle weg.

Mut een ieder ok zellef weetn toch? Rechts umme, links umme. Mak niet uut, de aofstaand blef er etzelfde umme.

Uut de varte zie ik een trekker staon en ik skatte zo in da-k er wel langs zol kunn. Dichterbi-j bekeekn, muk toch aofstappn en ietsies deur de barm en helaas ok in de modder. Ach, nou ja… da’s niet aanders, dat muk er dan mar veur over emm umme mien geliefde route te kunn vervolgn.

Goed, ik riede in redelijk vlot tempo deur want ik hebbe netuurlijk wat tied verleurn an et aofstappn en et loopnde gedielte, gien probleem. De pont staot er al an te koomn, helemaolt prima weer.

Toch net iets te vlot op-etrökkn, dus mutte bi-j et bushokkien helaas nog effn wachtn tot et dink warkelijk veur mien neuze leg ann-emeert. Zuuke mien strippnkaortien en zie iniens mien broekspiepn. Krimmeneel… da’s gien kiekn ja! Alles onder de modderspetters. En de fietse, verroest, da’s ien en al drek dat er aof dröp!

Daor zal Lub bliede mit weezn. Heremetied, de smalle weg hef wel zien spoorn achter elaotn! Dat ha-k eerlijk gezegd niet zo in de gaatn had. Gunst, da-s gien kijk zometiene in Gellemuudn. Al die keurige burgers en dan bin ik zo te passe.

Eerst de pont mar op, drei-je een beetien opzied, wat naor rechts mit de broekspiepn, aanders zal de kaortiesknipper ok wel denkn. Naost mi-j kump een aandere sportieve fietser anjakkern. Remt aof en staot precies stille bi-j mien nogal modderige verskienink. Gatver, ik bin mar weer mooi te passe!

“Mooi weer he? Ja, mooi weer.” En ik zie um mi-j heus wel anloern, bekek mi-j van top tot tien en ik mut toegeemn dat hi-j er inderdaod een stuk frisser uutziet. “Ie komt zeker van de Sluus”? Ja, rechtsumme. “Ie zeker ok, mar dan linksumme”? Warkelijk, miene een smerig lachien te verneemn!

Ik holle mi-j flink en probeere mien uuterste best te doen umme de Biebelse geschiedenis er dan mar bi-j te haaln. “Weet ie meneer…de smalle weg kent zo zien hobbels, bobbels, slechte paadn en smerig wegdek mar hoe muu-jlijk ok begaonbar, ik hebbe um eneumn!” “De briede weg was te gemakkelijk ewest”.

Hi-j kek mi-j an asof hi-j zeggn wil ‘waor hei-j et in vredesnaame over’? Ja, ik mut toch wat hé? Was ok niet een echt snuggere opmarkink, mar vuule mi-j ok zo bekeekn. ’t Is ok gewoonweg mien eegn skuld, had et briede pad muttn neemn, dat leg er ja veur! Al die skoele jeugd tuft daor ok laanks. Mooi keurig en strak pad, lekker bried en gien hobbels en vardere trammelant mar Lambert pakt toch elke keer weer dat verrekte rot paadtien onderan de diek mit smeerbende, troep en aandere prut. En juust gisteraomp- en nacht hef men de mais binn ehaalt. Da’s niet zonder slag of stoot egaon. Kan dat vollek niet ietsies netter warkn dan de hele prut kepot te riedn en de hele weg an flardn te jaagn? ’t mut toch niet al te muujlijk weezn umme een beetien te stuurn, de mais goed in de bak te kiepern en dan terugge te riedn?? Liekt mi-j niet zo’n ingewikkeld klussien, mar ik bin simpel, dat weet ik inmiddels. Kneus eerste klas.

Pont belaandt de overkaante en wi-j fietsn bijna gelieke op. Hi-j is uuteraard als sportieve fietser net effn sneller. Mar ik doe een mooie pogink umme em bi-j te holln. Altied leuk umme te kiekn hoe vlot ak nog binne op mien leeftied. Vlakbi-j de karkstraote, op de skeidink van et Kruudvat scheidn onze weegn. Ik ga linksumme richtink zeeman en de meneer rechtsumme richtink de grote karke.

Kan’t niet laotn…kieke nog ien keer achterumme. ’t Zal toch niet…jawel, wis en waarachtig, de onberispelijk skoone fietse staot bi-j de karke. En de deure valt net in et slot…

Lambert

reageren REAGEER | stuur door DOORSTUREN | printen PRINT | VRIJDAG, 13.10.17
Bedaankt, Lambert.

wat is dit weer kostelijk, deurdoen!
Albert Greveling | Zwartsluis | VRIJDAG, 13.10.17 | 12.46 UUR | Kwetsend of ongepast?
Vandaag:
13° | 9°
Meer weer...
Morgen:
14° | 7°


LIVE SPORT
Sc Genemuiden - HZVV H. 0-0
Olympia'28 - Vv Hattem 6-3
Sv Gramsbergen - DESZ 2-1
AGENDA
  • Zondag 22.10.17
  • Maandag 23.10.17
  • Dinsdag 24.10.17
  • Woensdag 25.10.17
  • Donderdag 26.10.17
  • Vrijdag 27.10.17
  • Zaterdag 28.10.17
  • Volledige agenda...

POLL

  • Gemeenten delen zorgen over aanvliegroute Airport Lelystad
 Terecht, het dossier is incompleet!
 Euh, wat is een vliegtuigbeweging?
 Hoe laag komen vliegtuigen over ons huis?
 'Uitbreiding Airport Lelystad vormt aantasting leefomgeving'

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.46985 s vps1