Woensdag 13.12.17 | 13.39 uur

Aflevering 316

Noggus en Noggus

Oh, kom er ies kiekn, wat er in oons’ winkeltien is... Oh kom nog ies ien keertien kiekn, want tis opni-j dikke mis! Nao Goedhart boekn Hasselt, gaot de kringloop in de Sluus ook definitief sluutn. Tjonge, Sunteklaos kreg et steeds muujlijker mit kedoogies haaln. Et zit ok niet echt mee he? Veul meer kank er ok niet van maakn, tis gewoon zoas et is. Van hogerhaand wördt gewoon beslist dat een winkel niet passnd of te klein is. Of zoks klöpt en warkelijk zo ervaarn wördt in et dorp is een tweede.

In mien beleving döt de kringloop goeie zaakn. Er is veul vraog want er heerst meer geldnood dan men beseft. Niet iederiene hef een mooie zakcent umme te besteedn en probeert via een tweedehaands winkel toch mooie ankoopn te doen. Ok is er een slag vollek dat et een complete sport vient umme te scoorn in een kringloop. Gewoon kickn daj iets viendn waor aj niet al te duur an komt en dat opni-j mit een laogien varfe umme te tovern tot een prachtig taofeltien of wat dan ok. Oppimpn, herbekleedn, alles kan teegnwoordig umme iets fraais naor oen zin te maakn en dat veur weinig geld. Wi-j Nederlaanders bint daor merakel goed in trouwns!

Ik kan ze niet op iene haand telln wie niet creatief te wark wil gaon umme geld te bespaarn en duur te koopn bi-j een woon boulevard. Veural de jeugd is hier ontzettend haandig in, ik iets minder mar goed…ik koope gewoon niks ni-js meer want ik zitte mien tied nou wel uut mit de iekn onverwoestbaare meubels van destieds, gekocht bi-j ons trouwn.

Hoe zol een moederbedrief in Zwolle nou ooit kunn veronderstelln dat er niet genog klaantn de toonbaanke passeern? Bint ze warkelijk wel ies binn de deurn ewest van een kringloopwinkel in een dörp? Da’s toch echt wel wat aanders dan een kringloop in de stad!

Ik kenne de dames Zijlstra, Doosje en van der Linde niet persoonlijk, mar as et net zulke lekkere en gezellige deerns bint as de vrouwn van de weekmarkt in Asselt, dan zok niet al te gauw zeggn dat de toeloop niet genog is. Zo’n moederbedrief wet namelijk niet de achterliggnde reedn wat iemaand naor zo’n winkeltien toe laot koomn. Et is vaake niet allennig et snuffeln in de spullegies, of et koopn van allerhaande dingn mar ok et sociale stukkien van ontmoetn, elkaare treffn en spreekn. Iets wat in een dörp een enorme driefveere is!! En waor et gezellig is, waor een gezellige sfeer hangt, döt algauw, ongemarkt, ok koopn. Dus toch winst.

Ik bin dan sowieso ontzettend beni-jd hoe een kringloop anno 2017 qua concept mut passn volgns een moederbedrief. Mut er uberhaupt een concept weezn dan?? Et liekt mi-j vri-j duudelijk: zoas vrogger de ruilhandel er was, zo is et anno 2017 idem dito van overtollig of ongebruukt spul. De iene mens mak de aandere weer bliede. Niet persoonlijk mar via drie dames in een gezellig, knus en goedloopnd paand achter een drokke supermarkt. Mooiere locatie kan toch niet? Van de iene winkel, zo de aandere inroetsn. Auto ertussn op de pekeerplekke, makkelijker kan et niet.
Dus veur boekn, en kringloopspullegies gaarne oe begeemn naor grotere plekkn as Zwolle of weet ik veule. Daor hei-j een zee an ruumte, kuj oe onpersoonlijk verschaansn achter taofels mit spulln en schappn vol tweedehaands dingn. Grote halln, lekker sfeervol mit die tl-laampn en kolde vloern en eindeloze rei-jn onoverzichtelijke lös getrökkn speulgoed en wat meer. Ziet toch gien kiepe wat aj overhoop haalt dus mooi laotn liggn en veural niet opruumn. Da’s veur de vollnde klaante die ok niemaand kent en herkent in zo’n tochtige hal.

Wi-j doet et dus Noggus en Noggus: weer een winkel dichte!!

Oh, kom er (nog) ies kiekn!!!

Lambert

reageren REAGEER | stuur door DOORSTUREN | printen PRINT | DONDERDAG, 30.11.17
Vandaag:
3° | 0°
Meer weer...
Morgen:
3° | 0°


AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.34668 s