Zelf bink nooit zo productief an et begun van de weeke. Op de maondag mu-k altied eerst eem op gaank koomn. En ik denke wel meer mensn mit mi-j. En as die eerste slok koffie naor binn is, ach, dan gaot et ok wel weer. Bi-j et tweede bakkien koffie maak ie zowaar al weer wat plann veur de koomde weeke die nog an oen voetn leg. En nao et darde bakkien, kump een mense dan toch mar ies in de bienn. Et zal dan zowaar toch mar gaon gebeurn!
Hoogstverbaasd lees ik dan ok dat een (opgewekte) energieke Wolbert Meijer op maondag nog var veur koffie tied, al zeer productief is! Lieve deugd, waor haalt ie de energie toch vandaon? Ja, logisch van et dak netuurlijk. Hoe koomn ze er op he? Volgens de berekeningn verbruukt men nogal wat Watt daor. Ik hebbe het nooit eweetn want zolaaank ik ambtenaarn heb moogn ontmoetn, zat de gaank er niet zo in. Zelfs bi-j de Sleepbootdaagn muj ambtenaarn voortsleepn, ze bliemn overal praotn, hangn en kiekn.
Mar mit energie-opwekkers muj haoste wel de slag te pakkn kriegn. In ieder geval opgewekt een poging doen umme an et wark te gaon. En dan is et begun er. De rest kump dan vanzölf wel. En mit een goed begun is et et halve wark, dus voila: veur de helfte … kold kunsien!
En umme iederiene ies een goed beeld te geemn van opgewekte energie, maj vanaof vollnde weeke alle energie meulns anskouwn bi-j de Lichtmis. Een hele maond laank maj gratis en veur niks flink umme riedn. Dat kost energie, dat klöpt, mar ie kriegt er ok wat veur.
En zo kreg de pont weer klandizie. Er koomn weer extra vaartiedn straks, let mar op! En tal van sluupverkeer overal en narns. Dat levert weer aordig wat boetes op en dat geld kuj dan weer gebruukn veur et verbriedn van de provinciale weg. Een soort van (on)opgewekte energie herbruukn.
En mit et verbriedn van de provinciale weg, zal die holtn aofrasterink er wel weer uut muttn. Ok weer verbruukte energie veur niks. Dat mus toen zo neudig gebeurn, dat was veiliger. Laot ik oe dan mar zeggn dat as er een vrachtwaagn de diek aofrolt, die echt wel deur een holtn umheinink vlög. Dat holt een vrachtwaagn echt niet teegn. En toen die paolties mit dat lattien holt ertussn kwaamn, waarn metiene al die invoegstrookies fut. En wat denk ie? Nou al die energieke ambtenaarn er weer ies over nao edacht emm: er koomn zowaar weer invoegstrookies an de provinciale weg. Dat is toch handiger en veiliger aj stoppn muttn. Waor energie paneeln op een dak al niet goed veur binn! Dat tast et denkvermoogn an ten goede. Wie wet wat er nog meer lös kump straks. Vandaage is nog mar de eerste dag in et leemn van een ambtenaar mit opgewekte energie op zien wark. Dat smak naor meer, naor veule meer!
Let binnkört op oen briemnbusse want de eerste weeke van de körtingsbonn van de gemiente gaot in. Disse weeke körting op een pannenkoek naor keuze bi-j pannenkoekenhuus de Lichtmis. Tweede weeke een extra gratis rit met de veerpont. Darde weeke een gratis menu bi-j restaurant de Blauwe Hand. En de leste weeke een mietsnvri-j weekendtien op de fietse langs Beukers.
REAGEER
DOORSTUREN
PRINT