Donderdag 19.07.18 | 08.52 uur

Aflevering 323

Een harde skrow

Veurige weeke zaoterdag rond disse tied was et flink rustiger bi-j de weg... teminste daor gung ik van uut. Verkeer lag stille vanwege de omleidingn die klaor emaakt werdn. Net een operatie rond et harte umme de vernauwingn en dichtgeslibte aders weer optimaal te kriegn. Allemaole veur et goeie doel: een verbetering bi-j Hasselt rond alle knelpuntn. Wi-j keekn er eigenlijk allaank naor uut! En wat een geweldig weertien er bi-j! De mann kondn flink deurwarkn in et lentezunnegien. Veul bekieks en volk bi-j et pad umme de boel nauwlettend te volgn. En varder nargens auto’s te bekenn op de diek, enkelt een pliesie, bus of ambulance.

Körtumme... een heerlijk rustig lente daggien veur menigeen die zich ies effn niet in et lawaai van auto’s en drok verkeer wol begeemn. Een uutgeleezn daggien veur de tuunierder, de wandelaar, hardloper of fietser. Mar dan een aandere route dit keer, argens richtink et Stapperster veld of zo.

Dat ha-k dus edacht, mar ik waare de Umloop van Noordwest Overiessel bliekbaar effen vergeetn. Goh...gung nog deur mi-j hen, die emm eempies een geweldig parcours: mooi over de lege diek, alle ruumte en alle vri-jheid umme bried- en laankuut te fietsn. Zolln ze et miskien express zo ereegld emm?? Juust vandaage gien auto’s bi-j de weg, eenuutgeleezn kaans!! Dat dacht is dus nog...

Dat dacht is dus later niet meer! Dat et parcours hier in onze buurte mooi bried was, was echter varderop helaas aanders. Wat een enörm drama!! Ik heurde et netuurlijk weer veul later, ok al bink columnist of wat ok mar...Lambert löp miestal achter de feitn an. Nou sjouw ik ok niet zo al te hard, dus dan kan et ok niet aanders.

Wat een domper!! Zo’n prachtige dag, zo’n mooie route en dan iniens zo’n valpeti-je!! Complete kettingbotsink van de veurste naor de achterste. Op de remm en gelieke veurover kuukeln over et stuur, over mekaare stuitern, en weet ik al niet meer wat er dan gebeurd in zo’n hardriednd peleton dat amper et heufd umhooge hef en mar des te meer veurover op et stuur leg.

Over skuldign emm wi-j et mar niet, want in feite hef zo’n peleton et vri-j knap in elkaare wat betreft seinn en deurgeemn van de veurste naor de achterste. Mit kleine gebaarn, een harde skrow en zichtbare signaaln wet iederiene gelieke wat er is en waor ze veur uut muttn kiekn. Een op elkaar ingespeuld team in feite. En dan toch dit…

Ie muttn netuurlijk naogaon dat de vaart er aordig in zit, de toernteller staot flink hooge en daor is gien ontkoomn an as er iniens iets opdoemt wat er wellicht niet had heurn te staon. De vraoge is uuteraard hoe die auto er uberhaupt kon staon, want er bint toch altied verkenners die de weg vri-jholdn en zörgdraagn veur een onberispelijk parcours zodat de wielrenners gien obstakels of wat ok veur de koezn kreign. En dan toch…

Aofgeloopn zaoterdagochtend, et was flink rustig bi-j de weg, et was gewoonweg flink stille bi-j de weg. Een soort van radiostilte, meer dan twee minuutn stilte veur wat er laterop die dag gebeurde.

Er waarn die ochtend varders gien auto’s te bekenn op de diek, enkelt pliesies en ambulances... richtink et Vene.

Lambert

reageren REAGEER | stuur door DOORSTUREN | printen PRINT | VRIJDAG, 13.04.18
Vandaag:
26° | 15°
Meer weer...
Morgen:
25° | 15°


AGENDA
  • Donderdag 19.07.18
  • Vrijdag 20.07.18
  • Zaterdag 21.07.18
  • Zondag 22.07.18
  • Maandag 23.07.18
  • Dinsdag 24.07.18
  • Woensdag 25.07.18
  • Volledige agenda...
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
advertentie
0.17176 s