Zaterdag 21.07.18 | 11.31 uur

Aflevering 327

Et is een regelrechte plaoge!

Ik bin er wel zo allemachtig skeitziek van!! Et gaot mar deur, al weeknlaank!! Aj net ´s aomps zo´n beetien de lucht eklaard emm…kuj ´s mörns weer compleet opni-j begunn!!

Et is een regelrechte plaoge!! Ik zitte nog liever de hele dag buutn dan dak een stap binn de deure zette. Want zodra ik iene voete binn de deure zette…wör ik vergezeld deur een horde rotvliegn die mit onmetelijke voortstuwingskracht naor binn zeiln. Gaon vervolgns middn op mien anrecht op mekaare zittn en wel ja…gelieke de koomde daagn verzekerd da-k ze zie vliegn. Die biestn bevalln al vliegnde zo weer van een ni´je serie vliegnde rotkrengn!

En ik hebbe alles al zo-n beetien uutprobeerd. De middelties van oldsher, wat mien va en moe deedn. Van die smerige rotplakstrips waor aj soms zölf eerst in zittn te griepn umdat de punaise te snel lös sköt. Mit een pikkerige doem en vinger probeer ie dan nog ienigszins die strippe an et plafond te prikkn. Waare et niet dat et plafond teegnswoordig gien skrooties meer bezit mar kunstof plaatn. Nao een lamme arm en genadeloze probeer gaatn in et kunststof, weer van de stoel aof, waornao de strippe per ongeluk teegn de taofel of stoel ankump en daor die plakdraodn an bevestigd. As alles zo-n beetien onder die plakrommel zit, opni-j een verwoedde pogink umme de inmiddels drastisch ingekörte plakstrippe nog ies an et plafond te kriegn. Argens mut een meugelijkheid weezn umme dat klotedink te bevestign. Al ist mar tussn twee plaatn in, in et gleuvien.

Nao een stief kwetier is de keukn behangn onder de vies ankieknde bungelnde strips. In elke hoek iene. Die dingn kostn gien drol bi-j de action dus umme Lub een plezier te doen, wat extra rekruutn ter bestrijdink van tergnde steeknde, kriebelnde, vliegnde rotbiestn.

Nee, ´t is warkelijk gien gezichte, geef ik toe en as nao een uurtien zo-n dink behangn is mit tal van zwarte vliegn…tja dan oogt et inderdaod veur gien meter. En in feite is et water naor de zee draagn. Zodra aj de deure lös doet, kump de hele santemekraam van feestgangers naor binn. Waorumme et dit jaor in vredesnaame zo merakels heftig is, weet ik niet mar as iemaand mi-j kan vertelln hoe ik dit de baas mut wördn. Zeg het!!

Een stuk of dartig vliegnmeppers in-eslaagn. Her en der liggn die dingn ok nog argens op et anrecht. Dan emm wi-j nog de spuitbusse van de welkoop van Gerard bi-j de haand. Ak mien kunstgebit in t bakkien edaon hebbe ist al bijna een ritueel umme mit de busse rond te wappern in de keukn en gang. Flink naor boomn spuitn en wachtn wat naor beneedn dendert. Volns de beskrievink muttn ze bi-j bossies neervalln. Ie hoeft enkel naor bedde te gaon en ´s morns een caravan an uutgevleugn, vleugellam geslaagn zielties op te veegn. Et mut zwart van de vliegn weezn in mien belevink…mooi niet!! Ak er hoogstens twi-je op kan gaarn, he-k al dikke winst! Weer bi-j de poot of vleugel eneumn! En die bussn kostn ok niet niks, dikke 7 euro. Vrogger was dat machtig goed spul, mar teegnwoordig weet ik niet wat ze erin knikkern, mar dat et veuls te wiek is, dat weet ik wel. Niet stark genog, vrogger was et puur vergif, nou een ongeconcentreerd spullegien water. Daor raakt gien iene vliege van ondersteboomn.

Och, en dan vergeet ik zomaar de paorse lampe. Elke aomp -nacht dat dink an. Ik verkneukele mi-j al bi-j et heurn van et geknetter zoas vrogger bi-j de slager in de slageri-je et geval was. Mar helaas, ok dat mag niet baatn mit de kwaliteit van anno 2018. As er ientien op et licht aofkump ist een blinde ´daze´ denk ik. Hartstikke per ongeluk!!

Dat bint zo effn de grote naodeeln van et woonn in et prachtige landelijke netuurgebied van zwartewaterlaand. Mietsn, vliegn en aander gespuis. Tot aj er gek van wördn…

Wa.k zegge…buutn is et soms nog beter uutholln dan binn. Want aofkoeln is er netuurlijk niet meer bi´j. Een raam uutzettn kan niet. Dus in huus is et een vies warme bedoenigge mit veule huuskamergenootn die zich al bruuj-nde voortplaantn op mien anrecht. Ik, as machteloze toeskouwer, kieke genadeloos toe hoe dit ritueel zich vörmgef. Een genadevolle mep mit de vliegemepper doseert et antal mit iene minder. Aof-evoerd naor de spuulbak, water erover en zien ende is in zicht. Nooit eheurd van de opstandink? Kreng vlög later weer vrolijk rond tussn zien vriendties want in de spuulbak is never nooit een dood zwart uutgevleugn vliegien meer te bekenn. Of ik ze zie vliegn…?

reageren REAGEER | stuur door DOORSTUREN | printen PRINT | WOENSDAG, 04.07.18
Vandaag:
26° | 16°
Meer weer...
Morgen:
26° | 16°


AGENDA
  • Maandag 23.07.18
  • Dinsdag 24.07.18
  • Woensdag 25.07.18
  • Donderdag 26.07.18
  • Vrijdag 27.07.18
  • Zaterdag 28.07.18
  • Zondag 29.07.18
  • Volledige agenda...
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
advertentie
0.18132 s