Dinsdag 13.11.18 | 13.13 uur

Aflevering 331

Columnistn? Kant ok niet helpn!

Skrievers bint ok niet meer wat ze ewest binn. Columnistn ok niet. Dat döt mar wat, as zie een keer zin emm, skriemn ze ies iets. En as ze gien zin emm, doen ze niks. Liekt et... Mar toch zit er eigenlijk wel een hele gedachtngaank achter. Zölfs as zie gien column anlevern bint ze er toch echt wel mit bezig. Zalt oe uutleggn...gelieke as de ni-jste column eskreemn is, dan rammelt er al weer iets in de harsens umme een tiedig een vollnde te maakn. Een inwendige planning van dan en dan de vollnde. Effn de berichtn aofwachtn, kiekn in de kraante en de ni-jsbodes wat er in Zwartewaterlaand zoal gebeurd. En tja...dan staot er weinig tot niks in die blaagies wat de andacht trekt. Gien intelligent ni-js, gien interessante onderwarpn, gien spectaculaire mensn waorover Jan en alleman et ies wil emm. Gewoon een normale deur de weekse weeke. Dan is et flink zuukn umme de boel skriemde te holln! De harsenties begunn te zeurn dat et nou echt mut gebeurn, zie begunn verwietn te maakn dat de boel op-skoeft, dat er steeds meer tied tussn de regels kump. En terecht!!

En ´t is nog niet iens zozeer dat de baas begunt te mauwn da-k op mut skietn...´t is meer zölfkasteidink an et wördn. Veural veur Lub arg gezellig!! Dan bink nörsterig en sacherijnig. An et prakkezeern wa-k mut skriemn. Daor kaank dan weer uurn mee zittn te zittn. Gewoon peinzn, overdenkn en veural, veural weinig tot niks zeggn. Blik op oneindig en gewoon wachtn op een geschikt skriefmoment en de geest!! Dus al die daagn dat men op de kraante kek of er al een ni-j stukkien staot...bi-j deze de reedn achter de skarmn...een inmense wereld van gedachtngaangn, gepeins en gepieker!

Gelukkig bink niet de ienigste in disse situatie. Allennig hef een aander weer zo zien eegn reedn umme niet te skriemn. Neemt mien collega Jan Blei. Die döt momenteel in vremde zaakn begriep ik. Totaal gien tied, hartstikke drok!! Dat kriej mit mensn die zoveule gaavn emm dat ze de dag niet meer deur kunn koomn deur die altied mar bruisnde overwarkte harsens. Dat mak gewoon overcapaciteit, uurn en nachtn... tot overmaat van de neudige energieleveranciers van maag en darm. Er zal toch ok egeetn en edrunkn muttn wördn tiedns al die uurn van spontane ingevingn van creativiteit!! Denk dat de koffie niet is an te sleepn, wellicht af en toe wat zwaorder geskut van cola. Dat is nou ok weer niet bepaald doeltreffnd umme et veule slaopgebrek op te vangn. Ach en een beetien meer is goed veur de gemoedern van lijf en ziel! De boel mut deurgaon, op volle toern en et mut eerst klaor eer men rustn kan. Zo warkt et mit disse creatieve mensn van geest. Dat stopt gewoon niet, dat gaot deur tot ze er bi-j neervalln.

Zo bink dan weer niet. Ik gao gewoon starker geskut drinkn en nuttign mar legge mi-j er al gauw bi-j neer dat de geest die aomp niet kump en gao dan gewoon naor bedde. Gien column...ja jammer dan. As de geest niet wil...dan mu-k weer een dag wachtn. Ik legge de skuld ast waare buutn mi-j neer. Kant ok niet helpn. Ik bin ok mar aofhankelijk!

Wie wet kan Jan Blei mi-j ok nog ies gebruukn veur een musical? Ik bin ok ien en al raadselachtig!! Alhoewel ik nou dan wel ien en aander pries egeemn hebbe. Mar er blef genog stof over veur een uurnlaank opvullnd programma. Wellicht kaank dan zölf toch nog teegn die tied een stukkien anleevern. Ak et mar weete... dan kunn de harsens een tiedspannink maakn en vandaage alvöste begunn te rammeln en te treitern. Pure zölfkasteidink en daor doen wi-j et immers veur?

Lambert

reageren REAGEER | stuur door DOORSTUREN | printen PRINT | VRIJDAG, 26.10.18
Vandaag:
12° | 4°
Meer weer...
Morgen:
13° | 4°


AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
3.03417 s