Zaterdag 15.12.18 | 17.20 uur

Aflevering 332

Sint kom dr in!

Bin er nou wel zo´n beetien klaor mit!! Man, wat een engelngeduld mu´k weer emm!! En aj mi´j een beetien kent, dat weet ie geliek al wel dat ik dat bepaald niet hebbe. Ik hebbe sowieso al gien geduld, dus laankdurig geduld zit er dan helemaole niet in. Ik wil vlot aofwarkn, vlot handeln en skaakeln. Niks anmoddern, niks uutstelln en veural niks laankdraoderig anklooi´jn!!!

Helaas is dat wel et geval en mut menige Sluziger zich via ziedweggies, looppadties bi´j Grevelink langs de Zintuugntuun, een weg baann naor et aandere gedielte van de Sluus. Best wel droevig dat et er niet wat vlotter an toe gaot. Ie zolln denkn dat er binn no-time wel mit de stienties leggeri´je een leuk mozaiekien teveurskien etoverd kon wördn mar zölfs simpel gewoon neerleggn skient al een groots probleem te weezn! Gewoon plat naost elkaare, niks biezunders in feite, en dan nog weekn, zeg gerust maondn erover doen!! Ie vraogt oe toch aof he?

Zittn ze een beetien mit de mobiel overuurn an et maakn of is de skaft veuls te laank? Is et zaand niet goed of mut elk stientien eerst nog skoon emaakt en ontsmet wördn veur hi-j weer neerelegd wördt? Zit er een hele gedachtngaank achter waorumme stientien iene niet bi-j stientien twee kan of stootn zie elkaare aof? Zeg et mar... mar de gaank is er uut!!

En dat mag gerust wel effen kenbaar emaakt wördn, wat zeg ik...daor ma-k gerust flink kwaod umme wördn want verdorie al die kapriooln uuthaaln umme fesoenlijk de paadn op en de laann in te gaon is er niet meer bi-j! En dan hei-j de gaank erin en ...ach j...stom, aofremmn en via via et aandere padtien varder. Uutkiekn daj deur et lösse zaand niet gevloerd gaon en bi-j Boender veur de deure op apegaapn ligt.

In hoevarre dit klussien nou nog duurn gaot?? Who knows? Et sköf steeds een beetien op, zowel in de straotn as de daagn/weekn/maondn. Zölfs de begrafenissn liedn er mit een lange 'ij' onder. Ok die muttn creatief te wark gaon mit de tocht naor de olde begraafplekke. En mit de tocht naor Barskop is de route op zien minst ok weer kunstzinnig uutedacht umme de Arembargerstraote mar ienigszins te vermijdn. Zo ziej mar weer... zölfs aj er niet meer bint, muj nog rekenink holln mit opgebreukn straotn.

Da´s dan altied weer verrotte jammer dat ien of aander gemientelid nou juust hier dan weer niet woont. Die zol van narigheid et dan miskien ies ann-ekaard emm: dat hi-j daordeur steeds te laate op et wark kump en zien koffie bi-j binnkomst steeds mut missn.

Mar et skient allemaole vri-j weinig te helpn. Wellicht draag ik nog een beetien toe mit mien gefoeter? Laot ik dan mar wel weezn: as sunteklaos op disse meniere et dörp deur mut, dan bink bange dat onze grote kiendervriend zien mijter rap an de hoogste takkn van de boome gaot hangn. Ie zolln nog eerder in die beste man geleuvn dan nog een sprankien geleuf te hebbn in et straotgebeurn dat mar niet klaor kump.

(Op den wijzen van daar wordt aan de deur geklopt)

'Daor wördt an de weg ewarkt, weg ewarkt, weg ewarkt,

daor wördt an de weg ewarkt in hiel de Sluus'.

Niet dat ´t-echt opsköt zo,

Niet dat ´t-echt vlot gaot zo,

mar wi-j hold de moed dr-in

Sint kom dr in!'

reageren REAGEER | stuur door DOORSTUREN | printen PRINT | MAANDAG, 12.11.18
Vandaag:
0° | -3°
Meer weer...
Morgen:
6° | 2°


LIVE SPORT
Genemuiden SC - Urk 0-1
Omlandia 1 - DESZ 1 0-2
CSV'28 1 - Olympia'28 1 1-2

advertentie
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.80181 s