Woensdag 21.08.19 | 17.54 uur

Aflevering 336

'Happy life'

Hi-j was ter iene mit een lellebelle van een snottebelle an de neuze. Elke dag argerde ik mi-j wel an dat enorme gruune geval dat ter immer onderan bungelde. Ik bleefe er ok steeds mar naor kiekn, ondanks dat ik dat helemaole niet wol, mar et gebeurde gewoon. Tja…mar hi-j was wel mien allerbeste beste vriend!! En ikke de ziende. Dan neem ie mekaare veur lief. Dan neeme ie de leuke en minder leuke kaantn van elkaare. Zo gung dat toen.

En hopelijk gaot dat nog steeds zo. Allennig bint de argenerissn wat groter en groffer. Ie kiekt niet allennig meer naor die kleine diggies mar ok veul al naor bezittingn en de verwörvn status. Want teegn mekaare opkiekn is zo’n beetien een tendens an et wördn. Waor ik vrogger nogal geobsedeerd van raakte waarn enkelt de ‘bonkn’ en mooie knikkers van mien lellebel-vriend. Hi-j had mi-j een peti-je knikkers waor ik enkelt mar van kon droomn. Zukkn zol ik nooit en te nimmer te pakkn kriegn, want mien va en moe haddn daorveur et geld niet. En mit winn wa-k ok al niet de beste. Dus ik hadde mar te slikkn: mooi bliemn droomn mien jong!!

Knikkern…touwgien springn, elestiekn, hoepeln en tollegien drei-jn. Wat he-k dat toch menig keertien edaon op et skoele plein. Goldn tiedn!! Echt speuln, vertier zuukn, rozebottels in de trui-jn douwn, enz. Lekker donderjaagn! En nao hallef viere weer opni-j, precies iender tot an eetnstied. En dan voldaon naor huus, eetn, wassn en naor bedde. Dag in, dag uut.

Op zaoterdag liefst ok nog, mar dan keek ik ok uut naor iets aanders! Ak in bad ewest waare, dan wast stillegies an tillevisie tied. Gewaapnd mit de streepies pyama an op de baanke mit een bakkien chips. Dikke feest!! Die iene keer per weeke veur dat kassien koekeloern. Happy life za-k mar zeggn!

Zo happy, dat ze teegnwoordig iets probeern uut te viendn umme mien jeugd-memories weer ni-j leemn in te blaozn. Want krimmeneel…men is er eindelijk achter dat de jeugd te weinig beweegt, te weinig buutn bivakkeert en veuls teveule achter een beeldskarm zit. Nou, nou, nou…hoe ist in de wereld meugelijk!!! Let wel hé...vier jaor ewarkt an een programma umme de jongern weer op de straote te kriegn. Laot mi-j niet lachn, warkn an een programma…

Hoezo een programma??? Weet ie hoe et simpeler kan? Wifi eruut trekkn, computers, tillefoons, en de hiele ratteplan uut de haandn rukkn en mit een skup onder de konte naor buutn bonsjoern. Fut…speuln! Ranja, koekien en dan wegweezn tot an eetnstied. De groetuh!!

Muttn wi-j nou warkelijk mit een virtueel spellegien de jeugd in bewegink zien te kriegn?? Bi-j nou van de pot erukt of niet dan? Asof de jeugd een beetien dom is en erin trapt? Die bint wel zo verrekte slim en deurzien zoks ok heus wel. Die gaon heus op gien kienderachtige meniere punties verzaameln umme daormit weer credits te kriegn umme as belonink iets op een computer te moogn.


Vier jaor laank hé, vier jaor laank iets ontwikkeln umme harsenties van kiender te motiveern tot actie en bewegink. Nou…forget it!! Geleuft mar niet in die gekkigheid. Jongern bint wel zo gehaaid en slim… er bint virtuele spellegies zat te viendn, die slaon dit soort onzin gewoon over. Ie gaot toch niet an de bak as et ok op de baanke kan mit een kladde chips?? Niemand is over te haaln mit mooie ontwikkelde programma’s umme de bienn te strekkn ast niet hoeft. En hoeveule hef dit grappien weer ekost??? Ja, ik durfe et amper te skriemn mar zo’n slördige paar ton gemienskapsgeld! Tonn waor ik vrogger hiele aandere dingn mit deed! En nou betaaln wi-j er weer lekker an mit umme onze jonge telgies mit een Jan Huign in de tonne op straote te kriegn. Lekker toch?

Inderdaod…et spellegien liekt uut, game is over!! Mooi geprobeerd, mooi bedacht mar helaas…mooi bliemn droomn mien jong!!

Lambert

reageren REAGEER | stuur door DOORSTUREN | printen PRINT | DINSDAG, 15.01.19
Vandaag:
22° | 13°
Meer weer...
Morgen:
24° | 13°


TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.29598 s