Maandag 18.02.19 | 09.54 uur

Aflevering 338

Kunstzinnig

Ik mut zeggn… ´t is wel effn wenn! Ik gao et liefst veur netuurlijke netura en ´echt´ mar och…kunst liekt mi-j ok niet vies! Veurige weeke ha-k al ien en aander erover eleezn en et zwiet brak mi-j dusdanig uut. Hebbe effn achter de oorn ekrabt wat men nou weer op de markt brengt mar waorumme ok niet he? Er bliekt een markt veur te weezn en de zaoterdagkraante he-k rond koffietied toch mar eemn opzied elegd. Dat artikel was niet echt eskikt veur onder de koffie mit Lub erbi-j. Niet da-k dingn stiekem doe mar een olde keerl as ikke lust aof en toe ok nog wel een fris blaagien en zovar ik mi-j zölf kenne…kriek nog steeds een heftige rooie reactie op et leezn van ´plezierige´ geneugtn des leemns.

Mar 't is een feit dus dat er een markt is veur leems-echte kunst: nuum et iets as kunstzinnige silicoonn seks! Ach ja, wa-k al zei: ´t is effn wenn mar dan is et ok wel weer vri-j normaal toch? Wie is er niet groot ebracht mit et speuln mit poppn en knuffels. As kiend begunt et dus al, da´s miskien nog wel meer skrikkn dan de silicoonn apperaatn van madam Priscilla. Eigenlijk hè, eigenlijk is et gek dat et niet eerder bedacht is. Wi-j mensn bint arrug aanhankelijk in-esteld en willn mar al te graag eknuffeld wördn. Lekker toch?

Mien frisse blaagien zal dus vervangn muttn wördn deur zoiets as kunstgrös. Ik hoefe nou niet metiene een heel voetbalveld mar zo´n stuk of wat….da´s mooi handig achter de haand. Kiek, niks verkeeerds over Lub mar zo´n poppe zit iets beter in ´t vel. Wat strakker en wat minder silicoonn waor Lub juust weer wat meer hef zittn. De boel is wat aanders verdield za-k mar zeggn bi-j zo´n poppe. En laotn wi-j wel weezn…de rek is er ok wel zo´n beetien uut…wi-j kent mekaare nou wel zo ongeveer. Mit zo´n poppe blief de eerste tied tenminste op een soort van ontdekkingsreize. Dat eemn uutprobeern, dat eemn bekiekn, dat eemn uutzuukn. Ja, ak er zo steeds meer over naodenke…zo verkeerd is ´t nou ok nog niet. Et gef weer een impuls an ´t leemn en dat kan weer een positieve uutwarking emm op mien, nou wel karige aofgereisde trippies. Dus in feite is et allennig mar een juuste keuze ak et zol doen. Zowel veur mi-j as ok veur Lub. Ik mut netuurlijk mi-j zölf ok wat skoone praotn aanders kriek last van mien geweetn.

Goed, ie hebt dan dus besleutn umme kunstzinnige silicoonn seks uut te probeern. Ie boekt bi-j madame Priscilla een Dolly Parton poppe veur een uurtien. En dan? Daor bink dan wel weer ni-jskierig naor. Liekt mi-j wel een boeind gedoegien. Ie stapt zo-n bordeel binn en ze douwn oe zo-n poppe in de haandn en de teller begunt te loopn. Een heel getodder umme zo-h poppe op de plekke te kriegn in de toegeweezn kamer. En ze bint ni-j hé, dat gef nog niet zo makkelijk mit! Ze bint nog niet soepelties in de bottn. Dan mu-k mi-j zoiets veurstelln daj zo-n kreng probeert op et bedde te loodsn en tja, et feest kan begunn! Ach, dom de eegn kleern nog uut…poppe blef keurig op de plekke en ie trekt oe zonder ienige skaamte vlugge uut. ´t Is toch mar een poppe, niks gien gedoe mit achter een gedienegien, whoppa gewoon in bi-jzijn van…lekker makkelijk.

En dan begunt et. Gelieke et labeltien van ´made in china´ al in de oogn. Toch weer duudelijk waor zo-n poppe vandaon kump. Nog argens et waslabeltien umme rekenink mit te holdn of kan et dan nou eindelijk begunn? En uuteraard…de tied tikt deur… Ies eemn hier an zittn, daor an sabbeln. En mar ies een goeie dikke kus op de mond. Aahh, ziehier…et zakkien mit witte körrelties teegn vocht is gelieke ok al evundn! Dolly Parton is silica gel-achtig goed veurzien. En zie ies bliekbar vochtig genog. Kump helemaolt goed!

Nou wat kan et plezier nou nog in de weg staon? D´r op of d´r onder dan maar hè? Aj er nou helemaole mee uut de voetn kunt vraog ik mi-j aof. Zol er ok geluud in zo-n dink zittn? Een beetien gekreun is niet verkeerd. Dan weet ie teminste aj et, as olde keerl nog goed doen. Zoks kuj verleern miskien, ie weet et mar niet?

Ja, dat zal!! Potver, ´t uure is umme. Gien tied genog ehad umme et klussien te klaarn, Bint bi-j lange nog niet klaor!! Da´s nou weer jammer, daor zakt oe de broek dan weer van aof! Veur de rest wast, ja wat za-k zeggn…kunstig en zinnig: kunstzinnig. Oftewel een beetien rivella, vremd mar wel lekker!

Lambert

reageren REAGEER | stuur door DOORSTUREN | printen PRINT | DINSDAG, 12.02.19
Vandaag:
12° | 2°
Meer weer...
Morgen:
12° | 0°


LIVE SPORT
BAS 1 - Olympia'28 1 1-1
FC Klazienaveen 1 - DESZ 1 4-1
Genemuiden SC - SVZW 2-3
AGENDA
  • Maandag 18.02.19
  • Dinsdag 19.02.19
  • Woensdag 20.02.19
  • Donderdag 21.02.19
  • Vrijdag 22.02.19
  • Zaterdag 23.02.19
  • Zondag 24.02.19
  • Volledige agenda...
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.64732 s