Woensdag 21.08.19 | 17.54 uur

Aflevering 339

Zo jammer hè!!

Et begos zo leuk, echt een keertien da-k dachte van ´YES, dat is nou ies dikke verdiend´en dan weer zo-n afknapper! Biezunder jammer weer...

En waor emm wi-j et in feite over hè. Denke dat er een dikke loage jaloezie bi-j zit. Een hele dikke loage! Ik zalt effen toelichtn waor et umme gaot: et Evert van Benthemplein. Nou mooi toch!! Die man hef zich destieds de pootn uut et lief eskaatst en twee jaor achter elkaare de eer op-estreekn umme as eerste over de streep te gaon. Echt een netuurtalent, echt een eerlijke winnaar! Een doodsimpele gewone boer uut Klooster die effenties tweevoudig kampioen werd. Et hele dörp stund op de kop, een ieuwigst klein plekkien in Overiessel dat wakker eskud werd. Een inwoner uut dat kleine gehuchien werd mi-j daor winnaar en dat mos netuurlijk goed evierd wördn! Een groots onthaal bi-j zien tuuskomst bi-j et dörpshuus!! En die doodgewone boer gunk daornao weer gewoon varder mit zien wark. Geweldig, wat een no-poeha! Niks gien uut de hoogte, niks gien ´kiek mi´j ies`. Gewoon weer varder mit et dagelijkse wark en leemn op de boerderie.

Jaornlaank getuugde de skuuredeure van een aofbeeldink van de skaatser. Dat was dan ok et ienigste ter herinnerink an die twee jaorn glorie. En nog jaorn later vertrök disse boer mit vrouw en kiender naor Canada. Uut de publiciteit. Hi-j vund et wel goed zo, gaf daor niet zoveule umme. Hi´j had zichzölf voldoende beweezn en dat was em meer dan genog weerd. Gewoon iets presteern veur oezölf.

Kump er ientien op et idee umme et plein dat op-eknapt wördt bi-j et dörpshuus te vernuumn naor Evert. Direct doen dacht ik!! Tuurlijk, gaaf, welverdiend! Een old inwoner, die iederiene zich herinnert. As men zol vraogn naor de reedn, dan was er tenminste een mooi verhaal over te vertelln! Een verhaal wat ok nog recent is, nog bekend bi-j et nou inwonende publiek van Klooster.

Maar nee…er bint alweer van die zeikerds die et niet willn! Van die alderieuwigste flauwe lui die mauwn dat et niet eerlijk is en dat een aander eerder vernuumt zol muttn wördn umme zien prestaties. Man, dat wet toch al niemaand meer? En dan nog…zol Harm Schreur in anmarkink koomn, wie van de inwoners kent et verhaal er nog achter?? En is Harm Schreur al niet vernuumt?? Jazeker! Genog zölfs. De Harm Schreur skoele en de Harm Schreur wandelvierdaagse. Dus mag et nou effen een keertien iemaand aanders weezn?

En hoevarre muj wel niet terugge in de tied umme in anmarking te moogn koomn veur een ludiek idee van een naams bördtien? Waor gaot et toch over? ´t Is mar een symbolische bördtien he!! Gien straote , gien tomtom die et op de route zal nuumn, weest mar gerust heur!

Persoonsverheerlink?? Kom nou toch!! Evert had gien capsones, was er de man niet naor. Et hi-j hef zölf ok niet de muu-jte eneumn umme zich veur te draagn umme een plein naor zich te laotn vernuumn. Hi-j zol nog eerder over-ehaald muttn wördn dan aandersumme.

Dan is er nog bliekbaar een officieel gedoegien die angef dat aj een in leemn ziende personage niet magt vernuumn. Daor holln wi-j ons in Zwartewaterlaand dan mooi niet an! Er bint hier al sowieso twee pleingies vernuumt en beide naor iemaand die ik geregeld nog zie fietsn. Gef niks, mar die regel wördt dus niet an-ehöldn. Gien argument!! In Gellemuudn en de Sluus bin twee vernuumde pleinn en gien kiepe die daor over valt dat dat niet mag. Of dat die persoon niks hef betekent veur et dörp. Et is gewoon een aordigheidtien. Een geste en een goed in de smaakvallnde benuumink.

En zo muttn die Kloosternaarn dat ok mar ies gaon zien. Gewoon een aordigheidtien zonder gezeur en officiele anvraogn. Een symbolisch bördtien mit een naame, man waor valln jullie toch over!!

Maak er effn een foto van, app die deur naor Evert in Canade en tis klaor. Er hoeft nog gien burgemeester bi-j an te passe koomn en et leemn gaot weer gewoon varder. Net as in januari –februari 85-86. Ieuwigst gezeik mit jullie!! Doe toch ies niet zo muui-jlijk man!

Stap aof van die idiote principes en breek et ies…maak dat bördtien en maakt oe niet zo sappel over! Gewoon een beetien ontdooi-jn . Dat leeft een stuk makkelijker en ie maakt er een bulte meer plezier mit in oen dagelijke leemn.

Was getekend, Lambert.

reageren REAGEER | stuur door DOORSTUREN | printen PRINT | WOENSDAG, 27.02.19
Vandaag:
22° | 13°
Meer weer...
Morgen:
24° | 13°


TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.31415 s