Donderdag 20.06.19 | 09.17 uur

Aflevering 343

Songfestival: Duncan Laurence

Ja, hier heb ik flink spiet van!! Best wel! Verkeerd inn-eskat. Niet da´k daor iets an kan doen want laotn wi-j eerlijk weezn dat ik et inn-skat hebbe op basis van jaornlange ervarink. Maar toch…ik had op mien hoede muttn weezn.

The day after et Song Festival... ik vuule mi´j nou net zo ientien die een herhalink gaot bekiekn van een voetbalwedstried. Ie weet de uutslag al, dus hoe spannd wi´j et dan nog kriegn he? Aj de balle nou in slow motion et doel in ziet gaon, of gewoon mit vlotte beelden bekiekt, de uutslag is al bekend en ie hebt et naokiekn in de herhalink. Zo jammer!!

Vanmorn heurde ik et heuglijke ni´js en gelieke dachte ik dat ik bliekbar toch zo´n olde vermuui´jde keerl waare die niet langer op had kunn bliemn gisteraomp. Mar ja, die eindeloze puntntellink die warskeinlijk toch uut zol wiezn dat wi´j wederumme zolln verliezn. Daorveur ha´k de puf niet meer. Hebbe Duncan nog wel effn beluusterd mar toen de knoppe uut-edaon. Klaor, ok weer ehad! Zo´n stompzinnig varsien van een oostbloklaand zol wel mit de eer gaon striekn. Een beetien flink overtrökkn showgien erbi´j van karig gekleedde achtergrondvrouwgies, flink geblèr en geskrow en dat zol de puntn wel scoorn.

Koomn wi´j as Nederlaand dan an mit een vent achter een piano. Meer niet. Iene vent, iene piano, that´s it. Nee, et opbliemn niet weerd. Nou, daor hê´k nou dus flink spiet van! Weet ie, ik zaate zo ies te reekn …de leste keer dat Nederlaand wun , was ik argens achter in de twintig, zowaar paar jaor etrouwd en volop in de kleine kiender. Kant mi´j zo niet herinnern mar wie wet…wellicht nog mit een jaanknd kiend op skoot et songfestival kieknde. Want dat was toen et ultieme aompien tillevisie. Daorveur troostte ie et kiend wel beneedn op de baanke in plaase van op de slaopkamer. Een tillevisie eemn stopzettn was er toen nog niet bi´j, dus zoks was mit recht een stoorfactor.

Ok een reedn tot halverwege de uutzendink ermit te kappn, is dat et songfestival niet meer is zoas et was. Veul meer laandn doen mit die totaal gien fesoenlijk varsien te berde kunn brengn. Laandn rondumme Ruslaand die wat mi´j betreft ien brok geluud bint wat nargens op slat. Onverstaorbaar en argernisse oproepnd gejaank. Meer kank er niet van maakn!

Vrogger waarn de laandn Zwitserlaand, Engelaand, Ierlaand en Frankriek mien favorietn. Ze haddn de taal mit, haddn prachtige gevuulige varsies en de beste zangers, zangeressn. Geweldig, traanntrekknd en emotioneel. Muziek mit impact en boordevol gevuul. Wi´j, mit ons Nederlaandse taaltien haddn et gewoonweg niet, op die paar keer nao dan. Dat was warskeinlijk puur geluk, puur gedingedong.

En nou, inmiddels alweer jaornlaank et hekke van de dam: veul te veule laandn, een eindeloze en uurnlaange uutzending en allerlei wilde meugelijkheedn tot muziek maakn en shows opvoern…tja, toen hê´k er de brui ann-egeemn. Niet meer zoast ooit was. Niet meer dé aomp ultiem genietn!! En veural niet meer opbliemn tot et ende.

En man mit een baord, tja hoe verzin ie et he? Conchita Wörst of zoiets, zokkn winn dan een songfestival. Veurig jaor een vrouwe mit een vri´j duudelijke menink en duudelijk postuur. Een echte persoonlijkheid dat dan weer wel! Iemaand in oer-belachelijke kleern, oer-belachelijk kapsel, oftewel een uutvergrote kiepe die mos broeddn op et goldn ei dat ze bepaald niet uut-evundn had. Alhoewel…miskien ok weer wel, zie wus eigenlijk dat winn van een songfestival anno jaorn 2000 niet meer is dan gigantisch opvalln van de rest!! Zölfs zie denderde in de herhalink deur mien beeldskarm, ´k wol dat zie et er uut-eknipt haddn mar vanwege heur umvang zok dan totaal gien beeld meer ehad emm. Dan blief ie an et knippn. Ik valle toch meer veur dat deerntien van ooit: ´ein bieβen friede´ , een vrouwgien mit gitaargien, wellicht blote voetn, en hagelwit jurkien…gos, vergane glorie!!

Goed, et is veur mi´j niet meer te achterhaaln, kan terugge kiekn wat ik wille, mar al weetnde dat de uutslag positief uutpakt, is laank zo leuk niet meer umme nog in spannink te kunn zittn mit de puntntellink. Ieuwigste jammer! De nagels bliemn heel, de gakballn gaon al kieknde nou wél op en juichn hoeft niet meer want naogespeeld bliede wördn is ok niet wat. Ha´k nou toch mar op mien leeftied effenties last van lichtelijke dementeernde uutvals-verskeinseln ...joh, dan ha´k et moment surprême tenminste weer echt kunn mitbeleemn, wat zeg ik...eindeloos kunn mitbeleemn! Elk uure, elk ogenblik ak weer in herhalink valle en uutzendink gemist weer bekieke.

Lambert

reageren REAGEER | stuur door DOORSTUREN | printen PRINT | MAANDAG, 20.05.19
Vandaag:
20° | 12°
Meer weer...
Morgen:
22° | 14°


TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.29782 s