Aflevering 348

Buusman baankien

Ja, ik weete weer narns van! Ik mutte et nou net leezn op de zwartewaterkraante…mar aanders wus ik weer mooi niks dus! Zo gaot dat dan he? Een bekende columnist dacht ik, mar arns van op de heugte esteld wördn?? Echt niet!!

Hoe kaank ik vredesname zo mien wark dan doen? As nou niemaand mi-j een beetien bi-jprat dan ist wel verrekte muui-jlijk skriemn! Kriege er allennig mar meer wark mit…Mut eerst alle kraantn deurwörsteln, dan de digitale kraantn bekiekn, dan ies umme mi-j hen kiekn in de regio en op die meniere zo’n beetien wies zien te wördn wat er zoal gebeurd elke weeke. Daor zit mi-j een peti-je tied in za-k oe vertelln! Ik heure of zie niet alles mar ik hebbe de boel wel aordig in et vizier. Over alles wi-k ok niet de wasse buutn hangn mar vaak hê-k wel weer genog stof tot naodenkn. Allennig lient niet alles zich veur een stukkien tekst in mien column. Lastig vak, niet dan?

Mar dat Buusman baankien hê-k dus niet zien ankoomn. Ik leese et net! En dus staot dat loodzwaore dink er inmiddels alweer een paar daagn. Nooit eziene! En niks over eheurd dat er een feestelijke openink was mit veule geneudigdn behalve ik dan weer!

Aanders ha-k daor uutgebreid over eskreemn netuurlijk. Over et ontstaon, over wie et emaakt hef en waorumme. En waorumme dat dink precies op dat plekkien mut staon en sinds wanneer et er al staot. Massa’s infermatie ha-k kunn geemn ak mar in-elicht waare en dat bink dus niet! Ik zegge er nou dus gien woord over want as ras echte burger uut Zwartewaterlaand ha-k minstens vief september in de Sluus bi-j et baankien muttn staon. Minstens!!!

Goed, ons’ Bilder vund et bliekbar niet neudig dat Lambert anwezig was en hef zölf weer vriendelijk lachnd et lintien deur eknipt. Mooie fotoshot en nummertien zoveule in zien plakboek van deurgeknipte linties evenementn. Zoks had gewoon een femilielid van et Buusman-gebeurn muttn doen mar ja, ons’ Bilder denkt daor aanders over. Een burgervader hef daor meer kiek op denk ik. Kump vaste krek waor aj et lintien raakt of zo.

Goed, ’t is gebeurd en ik bin weer buutn esleutn. Vuult onderhaand niet echt meer geweldig! Lambert hef zien beste tied wel had liekt et. Niet meer gewild bi-j et grote publiek.

En over buutn esleutn vuuln…Ja, hier bink dan teminste wel weer op tied mit:

Anstaonde vri-jdag in de Welkoop van ons aller olde gabber en vriend Gerard, die er inmiddels helaas niet meer warkt: ESCAPE NIGHT. Tja wat veur dikke onzin dat weer is, weet ik ok niet mar ik geefe et gewoon mar deur. Oe op laotn sluutn en dan er weer uut zien te koomn. Interessaant of niet dan?? Sleuteltien ligt arns in de winkel en die muj mar zien te viendn. Geweld mag niet en de boel kört en klein slaon liever ok niet. Denke dat et een leuke actie is umme de boel is van een goeie skoonmaakbeurte te veurzien. Teminste die sleutel zal vöstig op de grond geparkeerd liggn onder een beste laoge stof van een niet skoongemaakte plaanke. Aanders hangt dat dink wel tussen de spinnewebbn hooge in et magazien waor nooit iene de boel bi-jlangs gaot.

Lekkere klusse. Team-Bilder euh teambilding. Mit een horde an vollek dat buutn staot te loern of via een skarmpien oe an zit te gaapn…geweldig!! Wie verzint nou toch zoks idioots!! Echt belachelijk!! Gerard, wat zeg ie er nou van?? Da’s toch niet meer oen winkel he?? Dat had ie vöstig nooit goed evundn! Beetien tillevisie programma’s naodoen in een winkel. Van Lotje getikt toch??

Rare tiedn teegnswoordig! En dan za-k mi-j mar stille holln over de krankzinnige ideeën van (zegt men) intelligente Nederlaanders over de halverink van de veestapel veur ruumte woninkbouw. Denke da-k beter de kafferd kan holln want aanders kump er nogal wat stikstof vri-j. Breek mi-j de bek niet oopn!!! Wat stikstof crisis??? De ska is te groot veur de netuur, ja daaag!! Dus dan de veestapel mar inkörtn, beeindign of kringloopn. Ni-jste woord…kringlooplandbouw! Ieuwigst lachwekknd…kringlooplandbouw. Denkt daor mar ies over nao: ie zolt toch in de broek zeikn…ai, da’s dan weer ammoniak! En ammoniak wördt weer ummezet naor stikstof… stof waor aj in stikkn van et lachn. Hoge heren, hoge pettn…ik kan er mit de pette niet meer bi-j

Lambert.

reageren REAGEER | stuur door DOORSTUREN | printen PRINT | DINSDAG, 10.09.19