Aflevering 365

Hellep...waor is Irma???

En daor was Rutte weer! Kieke er gewoon naor uut as er weer een parsconferentie ann-ekondigd wörd! Vuule mi-j net zo’n klein kiend dat van va en moe een belonink kreg umme de zoveule tied: “aj dit en dit kunn...nou dan kriej een mooi kedoogien van mi-j. Mar dan muj wel heul goed oen beste doen, mien jong!”

Nou, kedoogien is nou ok weer net iets te uutbundig mar wi-j hebt wel weer iets meer vri-jheid te pakkn. Gut gut, wi-j magt weer naor buutn en dat zölfs met meer mensn! Niet in grote kluuties mar op 1,5 mtr wel weer mit mekaare. Kan niet blieder wördn. Er gaot weer een wereld veur ons oopn nao zo’n beetien uutgerekend (binnkört) 75 daagn huusarrest. En dat in een jaor van 75 jaor vri-jheid.

Gao mörn gelieke mien vreugde bezeegeln mit een vissien bi-j de viskraame. Ok al muk er tot Sint Juttemus in de riege wachtn tot ik ooit an de beurte koome. En een riege waorbi-j ok nog de 1,5 mtr aofstaand in oognskouw eneumn mut wördn…stao ik argens bi-j de Gellemuudigse pont ofzo. Mar kriegn za’k em!

Zat zo ies nao te gaon hoeveule mooie zunnige daagn wi-j dit jaor al had hebt rond de ‘feestdaagn’. Mit Paosn, mit de datum van 75 jaor vri-jheid, Koningsdag, Bevri-jdingsdag, tommiet mit Hemelvaart en wellicht mit Pinkstern. Prachtige weekendn, ja…da’s arrug zoer veur de horeca! Er had mi-j een umzet kunn weezn van heb ik jou daar en mit de leste woordn van Rutte van vanaomp gaot ok et Pinksterweekend naor de knoppn qua verdienste. Da’s niet niks hè!! Et zal oen ondernemink mar weezn. Dikke verliezn en dan ok mit Pinkstern pas op et allerleste effn de tente oopn. Dat zet dan ok gien zoodn meer an de diek! Begriepelijk miskien wel veur et virus mar minder begriepelijk veur de pörtemennee. Hoe hol ie de kop boomn water, zolt niet weetn. De aofhaal is dan wel een kleine meugelijkheid umme iets van de centn mee te pikkn mar ja, wat is dat nou in vergeliekink mit een terras vol vollek? Toch niks ja!

Denk ik an collega Heuckeroth: die mag weer an de slag mar ja…haal ie de ska in van de veurige maondn? Pries umhooge of zo laotn? Dat bint wel effn naodenkerties want mut de klaante de ska in de pörtemonnee vuuln of bi-j zo skappelijk en begripvol teegnover de klaantn daj et verlies moedig draagt en de skeere zelf in de knippe trotseert. Dingeggien heur! In oen achterheufd weet ie inmiddels drommels goed dat de klaante absoluut gaot betaaln: gien haor op zien of heur heufd die nog langer dit uutgegruui-jde kapsel wil verdraagn! Et mut en zal eraof, hoe dan ok en veur welke pries. Aanders naor een aander mar die vrag ok et neudige.

En iederiene hef et op zien of heur meniere vuult in de buuse. Miskien ok weer geld over ehöldn van eetnties, terrassien, bioscoopien of winkelnde koopgrage vrouwluu. Mar goed, over et algemien hef de corona ons allemaolt eraakt op financieel gebied. Zölfs mi-j! Tuurlijk, ok Lambert had zo zien ‘verdienstn’ die iniens plat laagn. Ja, aj niet dacht hè, ok disse olde keerl telt nog mit in et sociale leemn. Niet veule mar ach, ik doe et er mar mit.

En ok nao disse parsconferentie kiek ik alweer uut nao de vollnde. Waare et niet veur Rutte, dan wel veur Irma. Mooi mense toch? Lekker speuls anwezig, knus tussn de heern in en mar beweegn en beweegn umme alle doovn en slechtheurndn de boel duudelijk te maakn. Ik probeere dan ok van alles te ontciefern wat zie gebaart mar koome niet varder dan enkelt et woordtien ‘hamstern’. Ach, zo kneuterig herkenbaar!! En zaag ie effn vanaomp wat er gebeurde?? Zie werd inn-eruild veur een aander. Man, man…daor gunk mien Irma! Zomar iniens uut mien gezichtsveld verdweenn. En et is mar aofwachtn of zie vollnde keer weer van de peti-je is. Zomar iniens hè? Zonder annkondigink, zonder gedag te zeggn en zonder aofskeid. Waor is Irma? Ok flauw-evölln achter de coulissn van et veule hamstern an gebaarn? Te weinig salaris ebeurd? Te starke deo van Rutte? Tja, zeg et mar…miskien zat de broek niet lekker of mos zie neudig naor de wc.

Inmiddels is er al een petitie oopent umme heur terugge te kriegn. Want tuurlijk: wi-j wilt Irma en niet aanders!! Gien surrogaat, gewoon simpel ons’ Irma!! Wi-j magt nog niet in een ware volks-opstaand mar aanders deed ik et gelieke! Wi-j willn Irma terugge!! Wat is nou corona tied zonder Irma? Nou nou?? Da’s etzölfde as een cafetaria zonder klaantn, as een zunne overgeutn terras zonder gezelligheidsdrinkers en as een Urker visboer zonder Lambert.

Lambert.

reageren REAGEER | stuur door DOORSTUREN | printen PRINT | WOENSDAG, 20.05.20