Maandag 20.11.17 | 08.39 uur

Aflevering 310

Extreme hitte!

Vandaage mu-k naor et zieknhuus. Ik begeefe et al eer ik amper ien stap buutn de deure zette. Wat een extreme hitte! En juust vandaage mu-k dan in die knetterhiete auto naor Zwolle. Mus niet moogn, mar ik heb nou ienmaol die aofspraak staon. Controle um de zoveul maond.

Gewaapnd mit een flessien water en een flinke zakdoek umme et zwiet aof te veegn kachel ik op Zwolle an. Dit keer trap ik um wat harder an want d’r zit gien airco in disse olde bak. Hoe eerder hoe liever eruut! Of et nou an de warmte leg, dat weet ik zo niet, mar ik slinger meer dan neudig. Ik golfe erover. Ak niet uutkieke koome ik straks nog per ambulance op de plekke der bestemming. Mar niet over praotn, veur daj et weet verbiedn de kiender disse kranige keerl as weggebruuker nog langer deel te neemn an et verkeer. Da-k een gevaor op de weg bin.

Et kolossale gebouw res op uut de varte en nao laank zuukn, is er nog een smal perkeer plekkien veur mi-j over. En dan is et wachtn op de specialist. En mar wachtn en wachtn…mensn kiekn die et ok behoorlijk benauwd emm, zowel van de warmte as van de aofspraak. Al mit al duurt et nogal effn en et zwiet lekt mi-j van de kop. Tal van stiefe kwartiertjes varder, kump er eindelijk een zustertien ansjokkn. Ok al last van de warmte, zie oogt vermuui-jd en et haor hangt er wat al te hangerig bi-j.

In et kamertien zie ik niet mien specialist. Wel een jonge deerne en een nog veule jongere stagiaire. Spaans benauwd en zwietnd in et zwiet vraog ik naor mien eegn arts. “Het spijt me, maar de dokter heeft deze week bijscholing en de afspraken moeten toch enigszins doorgaan, dus u hebt de eer om het met mij te mogen doen”. “U mag zich wel in het kamertje hiernaast gaan omkleden”.

Veurda-k et weet stao ik in onderbroek. Ik vuule mi-j in mien eer ann-etast. Ik wil eigenlijk mien eegn arts! Die mannelijke man!! Zie zal et vaste best goed kunn mar dit bink niet gewoon. Ik stao niet alleen in onderbroek mar stao eigenlijk meer in mien hempien! Teegnstribbeln hef gien zin, dat he-k al wel in de gaatn.

Nao een kwellnd hallef uure, kank mi-j weer ankleedn en op huus an. Dit was mien warmste en benauwdste ochtnd ooit! Krimmeneel… waorumme mut zo’n specialist uutgerekend dsse weeke nou bi-jschooln? Toch nargens veur neudig? Hi-j hef de pepiern, is dagelijks mit zien wark bezig dus blef op de heugte. Zo iene verleerd et vak niet dacht ik. Zal wel bi-j disse tied heurn.

Ak ’s middes bi-j de visboer bin, kank et niet laotn mien ongenoegn effn te spui-jn. ‘Och, zeg ter ientien, ik begreepe dat lest de dominee ok al op een soort van studiereize was. Onder de nuumer van op college’. Ja, teegnswoordig kan et niet gek genog umme er tussnuut te kniepn! En wie zal dat weer betaaln? Juust, et gewone volk. Verhoging van zieknfondspremies of een extra duit in et collectezakkien.

En mar klaagn dat ze muttn bi-jschooln. Allemaole zo zwaor. Daagnlaank studeern, eindeloos stof herhaaln en allerlei cases deurneemn. Och, zol et haoste mit ze te doen kriegn.
En veur ak de herik in mien mond kan kriegn, gaot de man onverstoorbar varder…’begreepe dat die studie-of collegereize naor et buutnlaand was. Een tiental daagn. Want et was nogal intensief!’

Ja, toe mar…zoks kan niet gewoon meer in een gebouw in Nederland?? Doodsimpel in Kampen waor et meerndeel van predikantn studeert an de hogeskoele? Of Utrecht veur mien part. Dat hoeft toch niet letterlijk op de plekken die de Biebel nuumt?

Kanm er mit mien verstaand niet bi-j. Ik hadde ok een beter vak muttn leern, dan ha-k nog ies argens ekoomn! Dan ha-k op de baas zien kostn wel wekelijks willn herhaaln. Wel maondelijks willn bi-jskooln. Wel jaorlijks willn studeern.

Tuus ekoomn wördt mij de post onder de neuze eduwd. ‘Lambert, hier hei-j een brief van de gemiente. Zal wel over de rioleringskostn gaon of zo’. Een verhogink umdat die lui ok op cursus bint in de sahara waor ze oefenn op de deurstromink van de waterleidingn.

Ja zeg!!!!! Krieg et nou helemaole!!!! Dit geleuft toch niemaand he? Een medische keuring veur et verlengn van et riebewies. Mensn boomn de 75 jaor hebbn meer kans op lichamelijke probleemn. En lichamelijke probleemn emm weer invloed op et riedn.

En leg mi-j nou mar ies uut waorumme as ik die test nou niet in Salzburg, Parijs of St. Petersburg mag doen!!

Lambert

reageren REAGEER | stuur door DOORSTUREN | printen PRINT | VRIJDAG, 23.06.17
Vandaag:
6° | 2°
Meer weer...
Morgen:
8° | 2°


LIVE SPORT
DESZ 1 - Omlandia 1 2-0
HSV De Zuidvogels - Sc Genemuiden 1 0-6
Swift'64 1 - Olympia'28 1 3-1
AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.25065 s