Zaterdag 15.12.18 | 17.20 uur

Aflevering 330

Harfst is stamppot tied!

Zo laangzamerhaand gliern wi-j de harfst in. Disse weeke alweer wat lekkere najaorsbuj-gies op de kop ehad. Net miezerig genog umme de kop nat te kriegn. Ik hadde netuurlijk ok niet op de fietse muttn gaon, mar ach…een mense mut ok niet gelieke de berichtn geleumn as er een bujje op komst is volns de bujnradar. Da´s ok mar een betrekkelijk gegeemn toch? Helaas was et dit keer dan net ies raak en klöpte et dat de reegn mit bakkn naor beneedn kwam. Gelukkig waar ik niet wiet fut dus mit een beetien skuuln hier en daor kwam ik weer bi-j mien eegn dam. En dan is et altied de kunst umme oe niet te laotn kenn teegn de vrouwe. Wat nat ereegnd??? Nee, beetien klammig buutn!

En gelukkig bint vrouwn er machtig goed op in-espeuld umme mit de weerberichtn umme te gaon. Gelieke stamppot op et menu! Dat bedoel ik nou…Zie hebt er kijk op, zie bint iene mit de netuur, vuuln gelieke dat mann et zwaor hebt en stevige kost naor binn muttn warkn umme te overleevn.
Prachtig hoe zoiets in elkaare steekt! De scheppink zit interessant in elkaare.

Goed, de stamppot tied is an-ebreukn en vandaag eist nog niet gelieke DE stamppot der stamppotten maar wörtels en siepels, mwah…niet vies umme mit te begunn! Spekkies erdeur en een koelegien veur de sju. Nog een beetien ruumte op et börd veur een dik stuk rookwörst…Och, mien dag kan al niet meer kepot. Op zo-n moment is Lub gold weerd!

Allennig die rookwörst plag mi-j: dit is dan nog zo´n overheerlijke gerookt apperaat. Pure ambacht, van de slager. En over een tiedtien mu´k et misschien wel doen mit een vegetarisch kreng. Ja, lach mar…een vegatarische rookwörst, ei-j et ooit zo zolt egeetn? Weer wat ni-js! Et mut ok altied weer aanders dan aanders, wi-j bedenkt ies een vegetarisch stukkien vleis!

Hoe mu-k dat veur mi-j zien? Een opgerold stukkien keeze of tofu in de vörm van een wörst of zo? Ik kan mi-j er warkelijk niks bi-j veurstelln! Een UNOX of HEMA wörst is gewoon een wörst die al jaorn een vertrouwd gezichte is bi-j een Hollandse stamppot. Kump er iniens een mallot op et idee umme mien stamppot te verknalln mit een surrogaat wörstien. Laot staon de surrogaat sju, die van dit goedtien etrökkn kan wördn. Daor zit dan toch gien enkele smaak an? An disse gekkigheid doen wi-j niet mit! Ik trekke nog liever de pörtemenee as er een verhogink op mien gerookte wörst hangt! Een aander prieskaartien. Dat mut dan maar, mar gien gekunstel mit mien stukkien vleis.

Want weet ie…stamppot en rookwörst is iene. Ien geheel wat nauw mit elkaare verbundn is. Et iene heurt bi-j de aander en et iene kan niet zonder et aandere! Vergeliek et er mar simpel mit dat Adam bi-j Eva heurt, Koos Alberts bi-j de smartlappn, Charles Aznavour bi-j de chansons en Eefje Bols bi-j de Sluuspoort. Ien geheel! Denk ie an et iene, denk ie gelieke et aandere erbi-j.

En zoas ik niet gao wenn an een markwaardige uutviendink van een vegetarisch geval, za-k veurlopig ok nog niet wenn an et aofskeid van Eefje bi-j et museum. Klasse dat zie een onderskeidink ekreegn hef van ons Eddy!! Meer dan weerd, zie hef flink haandn en voetn egeemn an disse toeristische trekpleister. En zo ziej mar weer dat olde ambachtn niet verleurn muttn gaon. Eefje hef epleit veur een prachtig plekkien umme et museum onder de andacht te holln. Olde ambachtn, waoronder bi-jveurbeeld et rookn van een lekker flink stuk wörst!

De ni-j opvolgster van Eefje zal ok wel goed weezn mar wat een boer niet kent…daor mut ie flink an wenn!! Ik zal heur dan ok niet gelieke aofkraakn want iederiene mut wel zien kaansn kriegn netuurlijk. En zodra zie mit de winterfair een paar rookwörstn te hangn hef bi-j de Sluuspoort…dan bink gelieke umme!

Ik weet et…alles is te vervangn, zölfs een Eefje Bols. Mar van mien vleizige rookwörst muttn ze aof bliemn!! Ambacht is ambacht.

Lambert

reageren REAGEER | stuur door DOORSTUREN | printen PRINT | WOENSDAG, 03.10.18
Vandaag:
0° | -3°
Meer weer...
Morgen:
6° | 2°


LIVE SPORT
Genemuiden SC - Urk 0-1
Omlandia 1 - DESZ 1 0-2
CSV'28 1 - Olympia'28 1 1-2

advertentie
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.8519 s