Zaterdag 20.04.19 | 20.11 uur

Aflevering 340

Centrum-manager is alweer klaor?!

Nou, dat was dan weer vlot!! Onze nieuwbakkn centrum-manager veur Hasselt is alweer klaor. Niet klaor mit heur wark mar wel weer klaor mit de functie. Wat gaot dat toch alderieuwigste vlugge he? Die meidn doen dat zo effenties, waor ik jaorn en jaorn over doe. Plan opstelln en fut weezn.

Kriege er altied weer vraogteekns bi-j as ze zoiets in de kraante zettn. Et mak er vaake allennig mar ni-jskieriger op! As ze er nou gewoon inzettn wat er an de haand is mar nee…lekker raodselachtig gedoegien. Ze legt functie neer, umme persoonlijke reedn. Wat et ekost hef, zeggn wi-j niet en zie hef al wel wat edaone mar wat zeggn wi-j ok niet en wat zie nou gaot doen, zeggn wi-j ok mar niet. Zeg dan niks!!

Goed, gien centrum manager meer. Ach, wat zol zo ientien ok muttn doen? Et liekt wel leuk, klinkt wel leuk mar et wark is niet leuk. Want wat niet meer is, is ok niet meer terugge te kriegn. Een leeg eloopn centrum kriej niet weer op gaank. Mit gien meugelijkheid! Winkels die estopt bint, bint niet veur niks estopt. Een winkelcentrum is pas een winkelcentrum aj klaantn hebt en die hebt wi-j dus niet. Want de klaantn zittn in de huussies in Hasselt en in die huussies staot een computer en op et beeldskarm verskienn daor de mieste winkels wel. Van bol.com tot boni en van h en m tot jumbo. Hoe vars en snel wi-j et emm? Wat zol een centrum manager hier nog an toe voegn as ´s mörns ma de boskoppn tuus invoert en pa ´s aomps et krattien boskoppn op kan haaln bi-j de jumbo nao zien wark? Da´s pas saamn boskoppn doen…saamn winkeln toch? Ma voert in en va voert uut. Enkelt 4 euro statiegeld en hoppa…inlaadn dat krat en snel naor huus. Echt gezellig en sfeervol.

En wat is et centrum nog? Geklier mit de auto parkeern. Daor hef sowieso al gien iene zin an. Op de kade mit dat dink en dan loopnd naor de zaterdagmörn markt veur dat goedkope brood bi-j de gele marktkraame op et stoepien. Aj teminste vrog bint aanders is dat toch alweer op.

Oke, de gruunte dan nog mar een beetien uutpluuzer van de reclame folders wet daj net zo goed naor de boni kunt gaon. Daor win ie oen guldn as daalder ok niet meer mit. Goh, barre gezellig!

Wat zol Mevrouw Pilat dan veur plannegies bedacht emm? Tja, wi-j zult et nou nooit weetn, best wel weer spannd. Miskien had et et goldn ei wel ewest. De geniale toevoegink van veule pogingn tot optimisme en winkelgenot. Vreugde an een ieder die helaas nou mut uutwiekn naor Gellemuudn. Want daor is alles, een warm winkelhart, een bruisnd centrum en een gelukkig en tevreedn volkien.

Wie zol daor eigenlijk de centrum manager weezn? Die wet van wantn en hef et duudelijk goed ann-epakt! Van heinde en varre kump daor iederiene winkeln. Zölfs de internetters, de twee verdieners, de reclame pluuzers, Sluzigers via de pont, Hasselters, hele complete gezinn en uuteraard gemiente leedn van Zwartewaterlaand. Zol mi-j niks verbaazn as zölfs Bilder bi-j de aldi broodjes zit te scheppn veur 36 euro cent. In Gellemuudn kan alles! Alles veurraodig en bi-j de haand. Op winkel gebied, op karkelijk gebied en op horeca gebied.

Dan ist ok wel weer logisch dat et zo´n centrum manager gelieke al bi´j de haandn opbrek. Daor kuj toch immers niet teegn op? Dat volk dat weg-etrökkn is, blef weg. En wat aj var haalt, is lekkerder dus wi´j blieft allemaole shoppn in Gellemuudn. En gien Gellemuudiger gaot straks, nao een geslaagd plan van anpak in Hasselt winkeln. Zie bint verwend en haaln wat lekker is, dichte bi-j en niet varderop.

Geleuft mi-j mar, ´t is net as de beide Hasselter rotondes: bliemn drei´jn in eegn rondties mar varder koom ie niet. Mevrouw Pilat zal eerdaags wel bi-j de jumbo warkn. Kratties vulln of zo…ok weer klaor veur vertrek…

reageren REAGEER | stuur door DOORSTUREN | printen PRINT | VRIJDAG, 22.03.19
Vandaag:
23° | 9°
Meer weer...
Morgen:
25° | 9°


LIVE SPORT
V.V. Buitenpost - SC Genemuiden 1-1
Olympia'28 - DSV'61 0-0
DESZ - NEC Delfzijl 2-0
AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
2.79186 s