Maandag 09.12.19 | 09.32 uur

Aflevering 353

Genneger skoeltien

Bert, jonge…mooie uutdagink!! Da’s weer ies wat aanders dan een gewoon huus in de verkoop. An oe de eer umme er wat leuks van te maakn mit de verkoop van et Genneger skoeltien. Een beetien veurwaardn erbi-j en et mak et gelieke al een stuk interessanter! En dan ok nog ies een wetholder die et helemaolt ziet zittn…mi-j dunkt: een juweeltien veur iedere makelaar!!

Ach…laotn wi-j mar eem mit de bienn op de grond bliemn staon. Miskien toch niks meer biesunders dan een toko in Hasselt. Ondanks de lovende anpriezingn van Slingerlaand, die et meer dan biesunder biesunder vient. Biesunder gebouw, mit biesunder verhaal in een biesundere umgevink met idem dito biesundere Genneger inwoners. Dat vrag toch umme een biesundere bestemmink mit een minstens zo mooie biesundere pries?

Mien eerste ingevink zol toch weezn dat een biesunder gebroederlijk tweetal een bod zol waogn mar mit al disse veurwaardn umme te voldoen an een bepaalde pries en doelstellink van et gebouw, gao ik toch lichtelijk twiefeln. Die pries is gien probleem mar die toekomstige bestemmink wel! Volns Slingerlaand gien probleem umme er een kienderopvaank van te maakn. Dat past in de lijn van 255 jaor skoele. Mooi bedacht Maarten!! Allennig vergeet ie nou waorumme de skoele gaot sluutn…er bint bliekbar gien kiender meer in Genne van die leeftijd. Waor de kienderopvaank dan van mut bestaon is mi-j effn een raodsel. Kiender vanuut Zwolle of Hasselt die speciaal naor Genne trekkn, mwah…liekt mi-j niet bepaald logisch. Olders emm ’s mörns al drokte genog umme et kroost op de plekke te kriegn en dan is een opvaank vlakbi-j uutneudiger dan speciaal naor Genne te riedn. Wel gemütlich mar niet handig! Hoe as wi-j ok recht willn doen an historie. Dat was etzölfde mit de skoele in de Sluus…pure historie van et olde Agnietngebouw mar nou et ienmaol teegn de vlakte is…heur ie er niemaand meer over. Bliekbar is et iniens een verademink sinds de ni-jbouwhuuzn de grond uut riezn. Een fraaier angezicht en is de historie de grond in-eboord en hiermit de discussie platgewalst. Zaand erover, niet meer anruurn, mar laotn gedei-jn.

Bert, spannd karweigien! Meugelijkheedn te over mar de top viefe is mar betrekkelijk scoornd. De eerste van kienderopvaank skrappn wi-j dus gelieke mar. Eer er weer een kienderopvaank zol kunn koomn, dan mut koomnd veurjaor er toch minstens flink ane-trökkn wördn mit de verliefde koppelties. De tweede van een bed en breakfast…ach ja, die is er al in Genne miende ik. Beetien zittn concurreern mit de bewoners...ok gien optie. Darde dan, woonfunctie mit dienstverliend of ambachtelijk beroep eran vast-eknupt. Die laot ik nog effn in et middn…mu-k over naodenkn. Vierde en viefde: wonink of een opgesplitste wonink…tja, er blef niet veule aanders over he?

Goed, as geld niet zaligmaaknd is mar initiatief wél, dan mut er veur Bert een geweldige verkoop an koomn umme van te watertaandn! Biesunderder kan haoste niet. En mit et gegeemn dat er al minstens tien geïnteresseerdn rondsjouwn in et buurtskap…man, een goldn ei in haandn. Hier maak ie naam mit, hiermit breek ie deur as makelaar. Een beetien ansturink en beetien handeln en ie komt mit et meest creatiefste bestemmingsplan op taofel. Gewoon oen vuulsprietn uutzettn en mensn laotn koomn mit hun verhaaln over toekomstvisie en planning. Is oe toevertrouwd Bert! Laot ze mar zwietn mit hun kleurrieke enthousiaste droomn. Zolaank er nog gien tillevisie programma van emaakt zal wördn, kun wi-j et dan nog aordig in onze eegn haandn en gemiente holln. Gien publiciteit of dargelijke. Dan kriej vremd vollek en dat willn wi-j zeker niet! En veural gien Martien Meiland verbouwingsgedoe. Kump ok niet helemaolt goed in zo’n vredig en rustig gehuchien. Wi-j geeft et nou uut haandn an Bert en laotn ons biesunder verrassn!

Hierbi-j de inskriefink veur geoopnd!

reageren REAGEER | stuur door DOORSTUREN | printen PRINT | WOENSDAG, 27.11.19
Vandaag:
9° | 8°
Meer weer...
Morgen:
9° | 7°


TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.37406 s