Maandag 17.02.20 | 19.28 uur

Aflevering 357

'Mit genot, hé!'

Mit genot he-k et amusante stukkien van Herman Slurink eleezn in de ni-jsbode! Ik hebbe al wel vaker columns van em eleezn en ik viene zien meniere van skriemn biezunder antrekkelijk. Ik magge dat wel, die kleine subtiele humoristische opmarkingn, tussn neus en lippn deur.

Hi-j mei-jde mi-j dus ok mooi et grös veur de voetn weg umme uutgebreid verslag te doen van Swarte Sluys. Et evenement van aofgeloopn zaoterdag in de Sluus wat behoorlijk an-eslaagn was bi-j et publiek. Mit een schraal- en sprankien hoop op zo’n 250 man, kwaamn er mar liefst 600 op aof. Reegn deerde niet, men kwam gewoon!

Ak de foto’s zo ies bekeeke, was et ok een prachtig tafereeltien dat goed op-ezet was. Goed georganiseerd en inderdaod niet concurreend mar mit saamnwarknde horeca! Dat aj dukaatn mossn koopn umme oen happien en draankien te bekostign…goed an-epakt. Niks gien gezeur mit geld. Mar helaas was et eetn zo’n beetien al op teegn zeumn uure en bleef ie mit de dukaatn zittn. Ach, wie wet vollnd jaor weer een keertien zo’n evenement en kuj ze wellicht nog weer gebruukn. Zal wel gien holdbarheidsdaotum op zittn, niet dan?

Gien winterfair mar dit jaor dus een Swarte Sluys. Ongeveer een soortgelieke opzet wat uutbeeldink betreft: een anno 1900-zoveule straotbeeld mit daorbi-j passnde kledij van menige Sluziger. Prachtig schouwspel! De vaal gekleurde onderbroekn hingn te dreugn in de neervallnde reegnbu-je die wi-j er weer ies gratis bi-j eleveerd kreegn. Ze werdn er helaas ok niet ‘dato’ witter en frisser op mit al die walmnde vuurkorvn mar ach et zit normaal toch onder de kleern, dat ma-k dan ok niet meer uut.

Wat Herman allemaolt zag en verwoordde: dat kan hij makkelijk skriemn mar ikke niet. Ik zol gelieke uut emaakt wördn veur een olde vieze keerl die de kop gek lat maakn veur jonge frisse blaagies. Dak allennig oog hebbe veur wulpse en lekkere meidn van goede zeedn. Dak varder nog weinig van et hele interieur van Swarte Sluys ezien zol emm. Nou, klöpt dat netuurlijk ok, zo eerlijk bink ok wel weer…

Goed, aander onderwarp: actieve buurtverienigink Buutnkwartier was flink verteegnwoordigd! Eem-als mit de winterfair in mooie uitgedoste kleern, gedurfd acteer talent en speulse kwaliteitn. De Sluus hef veule in zien mars wat betreft de inwoners van dit pittoreske dörpien. Gien tonielverienigink zoas Hasselt mar wel spontaan straot-theater!

De kaans umme weer ies een keer bi-j hotel Roskam binn te kiekn was nou van toepassink. Ie kondn mooi ies effn loern hoe et er veur stond. En uuteraard…zoas et in herinnerink was zo tröf ie et weer an. Dat döt snoemn naor vrogger, een melancholische glimlach naor onze (veur)olders van die jaorn.

En ik mut zeggn dat et stukkien Roskam, de bakkeri-je en veurheen Mellema (nou Next Step) zich precies lient veur een leemtig skouwspel van de jaorn 1900. Karakteristiek en sfeervol. ’s Aomps dik bezei-jt mit strobaaln waor wi-j tot dik dinsdag an toe nog van kondn genietn umdat de boel nog heerlijk onder et stro bleef liggn deur de vochtige ondergrond van menige nao-druppelnde reegndruppels. Niet arg, daor kiekt wi-j deurhenne en daor ried wi-j overhenne. Zolaank aj niet mit de fietse onderuut gaot van gladdigheid, niks an de haand!

Et holtwinkeltien van onze tiedelijke- en verrassnde inwoners uut Ruunerwold…de verbeeldink en fantasie liet veur zich spreekn en et leek wel een beetien op een winkel uut veurgaonde jaorn mit zien mooie boomn-raampies mit speulgoed waor aj oe in verlekkerdn en toch nooit zol kondn kriegn. Tuurlijk, heul veul fantasie was neudig mar dat kreej vanzölf nao een antal dukaatn uut egeemn te emm bi-j de biertapperi-je. En mit nog heul veul meer fantasie zoj kunn inskattn wat er achter die raampies had aof-espeuld, mar dat blef een raodsel aj ienmaol weer nuchter bint. Laotn wi-j et daor ok mar op haoln, gezien de leste berichtgeevingn.

Varderop, wi-k toch weer effn benummn, Thijs mit de vrouwe en inclusief pony. Ok weer geweldig uut edost en zoas altied van de parti-je umme vrolijk en immer positief gestemd dit taferieltien van hun kaante op te fleurn.

Aof dit vollnd jaor een vervolg kreg…disse onverwachte wendink van een overweldignd enthousiast publiek gef behoorlijk anleidink veur een herhalink. Hopelijk blef et een succesnummer mar dat is in disse contrei-jn altied weer een verrassink! Eerst is et grandioos, daornao nog aordig leuk en dan helaas dood ebloedt vanwege nee hè, niet alweer. ‘Wi-j kent et nou wel’, ’t was leuk mar nou wat aanders’. Ach, dan kan in principe misschien de winterfair weer zien intree doen…wi-j holt van aofwisselink, toch?

Lambert

reageren REAGEER | stuur door DOORSTUREN | printen PRINT | DONDERDAG, 23.01.20
Vandaag:
7° | 3°
Meer weer...
Morgen:
6° | 3°


TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.31735 s