Vrijdag 21.02.20 | 12.13 uur

Aflevering 359

'Stellegien gasterds!

“Stellegien gasterds!” Hei-jt nou veur elkaare?? Buutngewoon droevig!! Was te verwachtn hé!! Kon niet uutbliemn aj een ni-jkomer zo hooge inskattn!! Dan kuj verrekte leege valln. Nou, zie hier…buutngewoon leege, nog varder leeger dan leege…tot op de grond in elkaare ezakt. Einde coalitie Zwartewaterland!

Lambert is netuurlijk weer op de hoogte van disse happenink. Hef de oorn weer gespitst en staot op skarp bi-j zulk regionaal wereldni-js! Ik bin ok al zo verrekte te spreekn over onze gemiente en zien warkvollek. Zoas Eddy nog de peis en vree verkondigde in zien karsttoespraak tiedns de karstnachtdienst, zo verkondigd Eddy nou de oorlog tussn de drie peti-jn in de coalitie. Wat nog sussn?? Niks te sussn…’t is over en out, aof-eloopn! Vertrouwn is totaal weg en dat mut er weezn, aanders gien saamnwarkink.

‘Inhoudelijk ligt er een goede basis en er zijn veel overeenkomsten. Ik heb er alle vertrouwen in! Een coalitie die ook recht doet aan de verkiezingsuitslag en zorgt voor een werkbare meerderheid. Zo werken we samen aan een Zwartewaterland van ons allemaal", aldus Tamme Spoelstra’.

Leuk ezegd Tamme!! Een stabiele en inhoudelijk verbiendnde coaltie. Geweldig…binn nog gien twee jaor! Dit gaot veul sneller dan de aandere acties van de gemiente waor ik nog steeds op een antwoord zit te wachtn. Daorin koom ik of in een wacht-riegie of in een ien of aander onderste laagien van et bureau of mit de fantastiasche woordn van “het heeft onze aandacht”. Dan kunn wi-j as burgers eindeloos wachtn op een reactie en ditte… nog niet iens as een ziedn draogien an mekaare bliemn hangn, of beter gezegd as een iezig dun glasvezelkabeltien…(ja, ik wrieve et er nog mar ies effn in da-k daor al sinds december 2018 op wachte want dat is mi-j beloofd!!! Nee…ik dramme niet, bin ieuwigste geduldig)… gewoon de kogel deur de karke en zonder pardon > einde verhaal! Finito, wi-j stelln ons vijandig op, over en out. Onomkeerbaar, stoppn met die handel. Jullie bevalt ons niet, en ons bevalt jullie niet!

Inmiddels is de pars conferentie net ewest en dat gunk er weer lekker hiete an toe. CU en SGP liegn letterlijk volgns de BGZ, nou ja, iets nettere benamink van ‘feitelijke onjuistheedn’. Mar kump op etzelfde neer toch? En er is gien bewies, dus ze liegn alles bi-j mekaare, aldus dhr Tamminga. “Wi-j hebt et zo goed mit ze veur, mar ja, wi-j wördt in twiefel etrökkn, dus zo wil et niet. Wi-j doet niks verkeerd, wi-j bint onskuldig”…. Goh, waor he-k dat toch vaker eheurd?? Liekt wel verdacht veule op al dat gezeur en gemauwel in et buutnlaand mit al die ministers, staatsliedn en gezagvoerders. Iederiene is de onskuld zelfde, niemaand döt ooit wat, altied de aander die de boel verziekt!

‘Ich habe es ncht getan’…

Nou, Eddy…succes ermit! Gaot mar ies praotn mit oen jochies, neem ze mar ies onder haandn as een vader die zien kiender uut mekaare mut trekkn as ze liggn te donderjaagn. Bestemmingsplan de Molenwaard mut mar eemn wachtn, dat is effn niet aanders. “De Molenwaard begunt weer een meule-stien te wördn”…de woordn van Margreet Bosma in 2018. Nou euh, niet allennig plan Molenwaard is een meule-stien mar ok de hiele coalitie begunt zolangzaamerhaand een meule-stien te wördn. Et hangt iederiene momenteel as een meule-stien umme de nekke. En umme nog effn in de meuln gezegdes te bliemn hangn: twee harde stienn maaln zeldn fien (aj beide niet willn toegeemn, dan kuj niet saamnwarkn), de meule deur de vang laotn loopn (gien holln meer an). Oftewel de meule naor de wiend keern (anpassn naor de umstandigheedn).

Gut, gut, wat bink weer verrekte grappig, bedoele et nogal cynisch mar dat zal wel duudelijk weezn, toch?

Zie daj er mar uut komt mit zien alln!!! Goei-jndag en nog een prettige middag varder!

Lambert.

reageren REAGEER | stuur door DOORSTUREN | printen PRINT | WOENSDAG, 05.02.20
Bah wat een naar woordgebruik boven deze column!
Hil | Hasselt | ZATERDAG, 08.02.20 | 09.32 UUR | Kwetsend of ongepast?
Vandaag:
10° | 9°
Meer weer...
Morgen:
11° | 8°



advertentie
AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.31975 s