Dinsdag 14.07.20 | 13.07 uur

Aflevering 366

Corona maotregels?!

Bin zo bliede da’k niet de skipper van et pontien bi-j Joonn bin! Wat een toestaand toch mit die corona maotregels! Ie zult er een puntheufd van kriegn, al die toeristn die op et leste moment er nog ies achter koomn dat zie niet hen en terugge kunn, oftewel muttn umme drei-jn of muttn ummeriedn. Da’s dan weer lekker, dat gaot weer fantastisch, of niet dan?

Ienrichtingsverkeer is soms wel biezunder handig mu’k zeggn. Soms dan hol ik mien harte vaste as ik een groepien verrekte sloom riednde jongern (mit zien drie-jn naost mekaare notabiene) van nauwernood wel veurbi-j mut riedn umme zölf niet van de fietse te knikkern. Uuteraard kump in dat tiedsbestek er net een teegnligger an en zit ik weer in een spagaat. Uutlachnde tieners die mi-j van alles toewensn an geweldige enthousiaste kreetn die mi-j toch iets minder vrolijk in de oorn klinkn! Jeugd…zo’n interessante doelgroep, zo’n uutdagink en investerink veur de toekomst.

Goed, et zal er bi-j Joonn ok wel zo ongeveer an toe egaon weezn: gefrustreerde toeristn die van alles toewensn umdat zie er nog ies wat extra kilometers bi-j an magn plakkn. Gien discussie meugelijk: ummedrei-jn, ummeriedn en/of veural niet over mit de pont! Er had beter een börd bi-j de weg kunn hangn mit de tekst: ‘hoe aj et ok went of keert, ie haalt toch bakzeil!’ ‘Dus gien gezeik of gezeur , skipper bepaalt en lat oe ienmaolig deur!’

En mit 6 fietsies of aanders 24 tegelieke overvaarn, tja dat wördt dan ok nog ies effn wachtn in de braande zunne. En wat gebeurd er dan weer, juust… mauwnde, zeurnde en foeternde toeristn die nog eempies hun gevuulns probeern te verwoordn. As de schipper et mar mag weetn en vuuln kan hoe gigantisch verveelnd et wel niet is umme corona proof de smalle weggeties te befietsn. Zo barre aofbreuk doende an een gezellig tochien!

En dan hebbn wi-j nog een paar idiootn op et water mit een motorbootien. Dat zie ok zomaar zonder vaarbewies maggn vaarn op et water en de regels totaal niet kenn! Koomn mit de skroef achter et pontkabeltien en voila!! Bingo. Gaot ok weer super fantastisch. Nog net gien ska an de boot en de motor warkt gelukkig ok nog mar twas weer nipperties wark. Dat zie er gien arg in emm dat de kabel van de pont veule maaln belangrieker was, da’s dan weer zo jammer! Hing weer an een ziedn draogien umme et mar zo te verwoordn: Pontkabeltien kepot…pontien uut de vaart en een batteri-je an beste stuurlui an wal! Ziej et veur oe? Mauwnde, zeurnde, foeternde en ok nog ies skrownde toeristn naor roekeloze vaarbewiesloze bootiesmensn. Man, man…ponties-skipper ten top!! Geweldig heur, heerlijk zo’n zunnige goedgemutste tweede Pinksterdag, kan niet op! Döt een mense zo goed, die buutnlucht en die opgewekte mensn umme oe hen.

Ach, er bint netuurlijk ok mensn die zich netties erbi-j neerleggn en begriepn dat disse maotregel er niet veur niks is. Alles umme een goeie aofstaand te bewaarn en alles veur de gezondheid. En mensn die teminste wel de veule bördn mit veur-ankondigingn eleezn emm. Want die stundn er wel mar ja, een skipper uutgoetern gaot altied nog makkelijker dan toe te geemn daj gewoon de oogn in de kontzak hebt zittn. Daggiesmensn, et is en blef interessant spul.

Veurlopg zal et bi-j heul veul incasseringsvermoogn bliemn en dat is best een intensief gevallegien van verstaand op nul en skolders ophaaln. ‘Skipper mag ik overvaarn, ja of nee?’ Mu’k mi-j dan ok an de regels holln ja of nee. Wat dunkt oezölf?? Beetien fesoen en skappelijk gedrag graag. Beetien skippern mit de riemn die wi-j emm toch?

Lambert.

reageren REAGEER | stuur door DOORSTUREN | printen PRINT | DONDERDAG, 04.06.20
Vandaag:
21° | 11°
Meer weer...
Morgen:
21° | 11°


AGENDA
  • Woensdag 15.07.20
  • Donderdag 16.07.20
  • Vrijdag 17.07.20
  • Zaterdag 18.07.20
  • Zondag 19.07.20
  • Maandag 20.07.20
  • Dinsdag 21.07.20
  • Volledige agenda...

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

MEEST GELEZEN

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.33099 s