Dinsdag 14.07.20 | 13.07 uur

Aflevering 367

Collectebusse!!

Sinds corona wördn bepaalde dingn ies teegn et licht ehöldn. Dingn die jaornlaank op een bepaalde meniere edaon werdn, koomn nou iniens in een aander daglicht te staon. Kump umdat wi-j nou creatief mit alles muttn umgaon en et aanders muttn anpakkn. En tja, dat gef metiene meugelijkheedn umme et ies aanders te goan doen. Want et gunk zoas et gunk, mar is dat anno 2020 nog steeds wel zo lucratief? Kan et miskien wat handiger, wat modarner of dus: wat meer social media?

Wel, dat is dan bi-j deze…de collectebusse!! Al sinds jaor en dag kump er iemaand langs de deurn. (de zogehietn niet nee durmn zegger) Iemaand die et liever ok niet deed, mar ja, da’s ok weer zo sneu veur de organisator, dus fut mar, toe maar weer. Allennig dit jaor dan nog, vollnd jaor niet weer. Ja,ja…

Mit de corona tied al bijna bliede dat et dit jaor niet kan, kump helaas de organisator toch mit et vermaarde tillefoontien dat de stichtink een aandere meniere hef evundn umme te kunn collecteern. Fijn he? Ie helpt ons toch nog wel he??

Et stelt allemaole niks veur, zo simpel as wat… ! En helemaole van disse tied, kwestie van effn deurkriegn en uutprobeern: Busse veuruut holln, QR code scann, bedrag intoetsn en woppa, klaor! En dat binn 1,5 meter aofstand en binn 1,5 minuut. Ja, ’t zal!!

Ooit nao edacht dat niet iederiene een mobiel hef mit de app van de baank? Dat niet iederiene de gezeegnde leeftied hef van eeuwige jeugd en hier niet mit op-egruu-jd is? Dat er miskien meer dommere mensn bint as mi-j en wellicht een hele uutleg neudig emm veurdat de transactie plaats kan viendn en dat dat meer kost an contact dan dat ik op aofstaand er geld inmikke? Waor praotn wi-j in vredesnaame toch over? As de collectant de busse veuruut hold en ik op aofstaand geld erin proppe, dan is ’t dunkt mi-j prima toch? Veur mien part had de collectant de busse op de grond ezet, een duwgien egeemn, ikke er geld in doen, bussien weer terugge duwn en deure dichte, collectant bussien weer oppakkn. Mar ik zal et wel niet goed zien, da’s wel mit meer dingn zo.

Stel… nee ..wi-j stelt niks: disse weeke kump er iene langs mit een collectebusse. Ie doet oopn en collectant vrag aj wat wilt geemn. Uuteraard zeg ie ja en ie wilt de pörtemennee al trekkn. Nee, nee, et gaot dit jaor effn een beetien aanders. Oh, hoe dan? Dan kump er een uutleg van heb ik jou daor en dat niet allennig bi-j oe mar bi-j de hele straote! Eigenlijk had et beter mit megafoon kunn gebeurn dan was iederiene gelieke inn-elicht mit de uutleg. Arme collectant…dat kost gelieke een tiedsverdrief van zo’n 1,5 uure extra. Goed, uutleg egeemn en ie ziet de klaante al wat achter et oore krabbn. ‘Euh, ik hebbe gien bank app. Dat gaot niet lukkn. Succes varder’! Ja, verroest, hei-j daor al die muujte veur edaon?? Compleet bankadvies erbi-j egeemn, demonstratie egeemn en dan gaot de deure alsnog dichte en dat zonder gedoneerd geld. Nou, lekker dan! Zölfs foldertien niet binn de deure kwiet ekund. Op weg naor deur 2, zucht.

Meerndeel van de jeugd is overdag an et wark, die is op kantoor of tuus(kantoor) en wil niet estoord wördn in de baas zien tied. Gien gezeur an de deur en ast mut, graag kört, dus de collectant wördt ok niet al te vriendelijk te woord estaon. De iets meer middelmaotige jeugd, de veertigers en vieftigers begriept de ni-je meniere wel mar is er nog niet gelieke handig mit en hef wellicht de app niet op de mobiel. Mut dat eerst nog installeern en dat kost weer energie en allerlei handelingn waor men totaal gien zin in hef. Ziej et veur oe??

En zo verlöp in 2020 veur et eerst de ni-je meniere van collecteern: noodgedwungn en nog niet echt inn-eburgerd. Daor was net effn gien tied veur. Dat kump en ik weet zeker dat de busse ok uut et straotbeeld verdwient mar men is er nou nog totaal niet an toe. Dit is te snel en te overrompeld. Zowel veur collectant as de klaante. Beidn staot elkaare an te loern van ‘wat mu’k hiermit? En wil ik dit?’

Opbrengstn en baatn weegn nietop teegn de kostn van tied, uutleg en energie. Et is te hoopn dat ze alvöstig nao gaon denkn over vollnd jaor, want geleuft mi-j mar…de collectantn bi-j kwiet, die geemn et op nao iene keer. Dit jaor dan nog weer inn-etrapt as vri-jwilliger mar no way: laot de busse mar an mien deure veurbi-j gaon, zuukt mar mooi een aander slachtoffer!!

Lambert.

reageren REAGEER | stuur door DOORSTUREN | printen PRINT | MAANDAG, 15.06.20
Vandaag:
21° | 11°
Meer weer...
Morgen:
21° | 11°


AGENDA
  • Woensdag 15.07.20
  • Donderdag 16.07.20
  • Vrijdag 17.07.20
  • Zaterdag 18.07.20
  • Zondag 19.07.20
  • Maandag 20.07.20
  • Dinsdag 21.07.20
  • Volledige agenda...

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

MEEST GELEZEN

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.37929 s