Vrijdag 14.08.20 | 14.01 uur

Aflevering 368

Sander Frank

Let op, let op!! Wi-j hebt weer ies een keertien heugelijk ni-js! Temiddn van de hele corona crisis is er dan toch nog wat te viern...eindelijk! Was al bange dat er teegnswoordig nog weinig te lachn valt. Mar mit de goedlachse Sander Frank gaot wi-j mar ies flink proostn! Een feessien: vieftig jaor Hotel Zwartewater!! Nou ja, bijna proostn dan, dat kump nog, mar dat er eproost wördt, dat is zeker!!

Weer een veurdeel van mien leeftied...ik weet et begun zölfs nog. Toen Sander nog een broekien was en zien va Paul et motel runde. Mien eerste feessien daor was in 1975, een jubileum brullefte van mien oldste zus. Veuruut mar, et motel mar ies probeern. En dat was gelieke een skot in de roos. Skappelijk, welwillnd en praktisch. Wi-j zaatn namelijk mit ziekte en daor wörde totaal niet muujlijk over edaon. Een bedde kon zo in de zaal ezet wördn, wilde de patient effn liggn. Nou, dat was wel effn makkelijk toch? Bliekbar hef et indruk emaakt, want ik weete et nog steeds en zie et bedde nog zo staon in de hoek van de zaal.

En nou staot Sander an et roer. Naamswiezigink van motel naor hotel en een ni-j logo. Een stukkien bi-j ebouwd en later weer een stukkien aofebreukn. Ach, ie probeert wat uut en daorveur muj soms wat investeern of weer inlevern. Hoe dan ok, wi-j ziet teminste weer et hele hotel in volle glorie in plaase van een groot gebouw dat al et fraaie uutzicht ontnam. Een mooi groot stuk an pekeerplekkn erbi-j en een gaaf gezonnegien umme te zoegn. Dat wördt keurig bi-j ehölln deur et personeel. Et watergeval, tja wat za’k et nuumn: een ietwat verroest verkleurde fontein?? Dat had niet ehoefn he! Dat dink is verkleurd deurdat zie em skoone espeutn emm mit water waor veul teveule iezer in zat…. Fout, fout, fout!!! Ja, Lambert is een kritische loerder en ziet zo ien en aander. Et zol toch stukkn beter staon as dat dink weer lekker fris en helder eruut zol koomn te zien? Een publiekstrekker toch en gien verloederd beeld dat erop liekt dat et water in het hotel niet meer te drinkn is?

Sinds ienige tied he-k nog veule meer te bekiekn daor bi-j de fontein: et barst er van de sportieve lui. Nou bink zölf daor totaal gien eembeeld van, inteegndeel: ronduut lui! Kant et ok niet helpn da-k er steeds naor kieke , ‘t zal wel deur et harde geluud koomn, laotn wi-j et daor mar op holln! Mar tuurlijk bin et lekker vrouwn, strak in et pak, goed gespierd en knap van uuterlijk. Zeker een anwinst veur een rondfietsnde olde keerl!! Prima initatief van die sportclub umme lekker in de gezonde buutnlucht te gaon sportn. Veural deurgaon, zo’k zeggn! Ik zal er een vaste fietsroute van maakn. In disse corona tied mut een mense toch een beetien zien vertier argens zuukn toch? Ik zie graag aandere mensn drok bezig en zich in t zwiet warkn in strakke pakkies. Lekker heur!

Of dat Sander zien wens was, precies veur zien hotel dat weet ik dan weer niet, mar ja dat zaaltien is nou ienmaol van die sportclub dus dat zal wel zo overlegd weezn. En dat er corona kwam, kon niemaand weetn. Dat hef de boel letterlijk naor buutn ebracht zodat de reclame zichzölf presenteert en vermenigvuldigt. Echt een toevalstreffer en mit succes nog wel!

Ok al is et jubileum dan nog in et verskiet…Sander hef al wel weer gastn in et hotel moogn verwelkoomn. Mondtiesmaot laotn de corona regels weer wat toe en kunn de toeristn weer intrek neemn in de hotelkamers. Een angenaam verblief neem ik an mit uutgebreide menukaortn waor de pries redelijk valt binn de begrotink van een gemiddelde gast. Ok de tarm ‘Bi-j Frank’ is al aordig in-eburgerd bi-j de kenner, een ni-j succesnummertien van Sander. Mooi bi-j passnd logo en idem dito speciaal daorveur gemaakte menukaorte. Zol mi-j niks verbaazn dat dit gecreëerd is deur de broeders van Active Creation van de overkaante: mit et uutzicht altied op het hotel mut zo’n klussien peanuts ewest weezn. De actieve creatieve geest rolde et zo van de pars. Wat ieje?
Goed, et feessien lat nog effn op zich wachtn, wi-j trekkn de champagneflesse nog niet gelieke lös, dat kump nog. Mar Sander is Sander niet dat hi-j al een heel klein ‘feessien’ egeemn hef an de skoeljeugd van groep 8. Mar zo effenties een köppel van die jongn te logeern…een echt kedoogien in disse coronatied waorin groep 8 aanders een karig aofskeidsritueel had ekreegn plaase van op vekansie te gaon. Sander…echt klasse! Daj hieran mit ewarkt emm waardeert Zwartewaterlaand en zekers de Sluus van harte. Een Tophotel mit 4 starn dat zich beskikbaar stelt umme veur de jongern een angenaam verblief te creëern. Dat mag ezegd en deurverteld wördn!

Wi-j proostn er mar ies op, ‘Bi-j Frank’ is et goed toevn!! En et smak absoluut naor veule meer!!

Lambert.

reageren REAGEER | stuur door DOORSTUREN | printen PRINT | WOENSDAG, 01.07.20
Vandaag:
28° | 17°
Meer weer...
Morgen:
27° | 17°



advertentie
AGENDA
  • Vrijdag 14.08.20
  • Zaterdag 15.08.20
  • Zondag 16.08.20
  • Maandag 17.08.20
  • Dinsdag 18.08.20
  • Woensdag 19.08.20
  • Donderdag 20.08.20
  • Volledige agenda...

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.34775 s