Vrijdag 14.08.20 | 14.01 uur

Aflevering 369

‘Oplaadn in Hasselt’

Dat toeristn toch een stuk belangrieker bint dan de eegn inwoners! Kan er mit de pette niet bi-j, tjonge…alles veur de toeristn. As die mar in Hasselt koomn en daor de weg kunn viendn! En ikke dan?? Bin dan wel gien toerist mar ik wol toch ok wel graag ies een fesoenlijk netwark, dus een goed bereik!! Nog steeds zit ik te wachtn op mien glasvezeltien mar in de varste varte gien miniscuul draogien te viendn die mien netwark een stuk sneller zol doen verloopn. Ik kan de kraante rustig leezn terwiel de computer in alle zien ontiegenlijke rust zien wark döt en de boel opstart. Kan nog rustig een bak koffie zettn en opdrinkn eer mien gewilde skarm dan toch eindelijk teveurskien kump. Ik bedoele mar…

Mar okee, niet jeloers of zo, mar mos et nou zo neudig? Een vri-j wifi netwark in de binnstad mit name op de toerist gericht? Hoezo op de toerist gericht? As die naor Hasselt willn, dan koomn ze er toch wel? En as zie ienmaol in Hasselt binn, dan is die extra toestaand niet neudig. Die anderhalve winkel en binnstad leg ie in een half uure aof en daor is gien wifi veur neudig umme alle ‘fraaie facettn’ te viendn. Kom nou toch…ie hebt toch oogn in et heufd, of niet dan? En al koekeloernde op oen mobiel ziej toch gien iene mieter van de architectonische bouwkundige gebouwn dus hol toch op! Veur dat geld haddn zie beter die glasvezel wat kunn anspoorn. Da’s veur ons as inwoners toch wel ietsies meer gewenst.

Begriepe er ok niks van dat men ok mar ien seconde denkt dat een plekkien een stuk meer antrekkelijker wördt deur een goed warkende communicatie verbeterink. Gao toch fut…zie bedenkn mar zo wat! ‘Oplaadn in Hasselt’, laot mi-j toch niet lachn! Denk ie warkelijk dat mensn uut Stadshaagn hier gaon winkelen??? En dat op de fietse zeker! Gut gut, alles te kriegn binn haandbereik en dan veur de lol naor Hasselt umme boskoppn te haaln…ammegrootje!

Vollnde punt: een QR code uut-ezet umme infemasie te kriegn bi-j historische of monumentale plekkn. Nou, daor hebt wi-j een gezellige stadstoerleider veur uut-evundn. Wat is daor mis mit? Niks zo leuk as mit een persoonlijke rondleider Hasselt deur te gaon. Vertellegien dit, vertellegien dat. Wat extra geleut en geouwehoer en de mensn emmn de grootste skik. En dat zal nou mit een QR code muttn? Wat een dikke onzin. Vraogt Driek en ie hebt een fantastische middeg mit veul infemasie en gezelligheid. Niet alles is te vervangn deur apperaatn, dat men dat anno 2020 niet meer beseft. Verrotte jammer!

Wel of niet een leemsgrote banner mit de warskouwink dat er gratis wifi is, ik vien et dikke onzin en hartstikke zunde van et geld. Ik snappe ok wel dat zo’n centrummanager van alles bedenkt umme de boel tot leemn te kriegn mar op disse meniere vienk wel wat varre gaon. Dat trekt gien extra mensn en totaal gien extra winkels of wat ok. Leuk mar et voegt totaal niente toe. As mensn niet willn, dan willn ze niet. As men niet plaastelijk gaot winkeln, dan kuj een hoop draodloze draogies anleggn mar et zet gien zooden an de diek. Wat aj kwiet bint, kriej niet terugge.

Dus mensn, mocht ie nou iniens de geest kriegn en naor Hasselt willn: ie hoeft niet meer bi-j de drogist umme wat veur onzinnige reedn de wifi code te vraogn. Ie hoeft niet meer bi-j de ienigste snackbar/restaurant veule muui-jte te doen umme in te loggn, de gratis wifi lonkt oe al tegemoet op de menukaarte. Waor blef de tied daj nog ies gezellig gungn praotn an de taofel in plaase van appn. Gezellig toch…een aompien uut mit de karbonade in de iene haand en de mobiel an de aandere. En een lol dat wi-j hebt!! Zo lekker bi-jpraotn mit mekaare!!

Nou euh…ie doet mar wat aj niet laotn kunt, laadt de boel mar flink op zok zeggn. Ik heb mi-j ok al wel weer genog op-elaadn. Stao weer helemaol op skarp, bin er weer klaor mit!! Man, man…wat heb ik weer een verrekte zin an een soort van cool down. Bin oververhit.

Zal via de app eemn kiekn of de jumbo nog lös is, dan haal ik mi-j een flesse mit een QR code van heb ik jou daar. Dak morn nog een stuk in de kraage hebbe. Bink teminste effn totaal niet bereikbaar!!

Lambert.

reageren REAGEER | stuur door DOORSTUREN | printen PRINT | ZATERDAG, 25.07.20
Vandaag:
28° | 17°
Meer weer...
Morgen:
27° | 17°



advertentie
AGENDA
  • Vrijdag 14.08.20
  • Zaterdag 15.08.20
  • Zondag 16.08.20
  • Maandag 17.08.20
  • Dinsdag 18.08.20
  • Woensdag 19.08.20
  • Donderdag 20.08.20
  • Volledige agenda...

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.28443 s