Woensdag 25.11.20 | 16.35 uur

Aflevering 375

Raodscolumn is net een femilieroman

Ik leese niet vaake columns van een aander, mar ach… soms valt oen erop en hef et bliekbar toch iniens oen interesse. Dat gebeurde mi-j disse weeke dus. Kraantien van De Stadskoeriers lag op de taofel en tiends de koffie dat dink wat deur ebladert. Miestal is dat richtink de rouwadvertenties, mar de foto van mevrouw Bosma, fractieveurzitter van de CDA trök mien andacht. Miskien was et een ni-j e foto van heur dat ik zodoende bleef haokn op die bladziede of gewoon de titel van de column, zeg et mar. Veuruit dan mar, effn et begunnegien leezn en dan aofhaokn want stukkies over de politiek vien ik niet bar interessant. Altied dat ieuwige gezwam over wel of niet verstaandige besluutn die er emaakt muttn wördn en dan toch mar weer aofwachtn en niks doen. Nee, mien tied kaank dan wel beter verdoen (en hun wellicht ok!!).

Tja, welke columnist hef er momenteel gien muui-jte mit: Waor skrief ie nog over in disse coronatied? Ok, Margreet had er bliekbar last van. Zie gef tenminste duudelijk an dat zie daor niet over wil skriemn. Logisch ok, want zie mut skriemn over de gemiente road. Mar toch… nog mar eemn een alinea leezn. Wie wet wat er nog kump!

Ach weet ie, ik leese gelieke ok alles mar, want de koffie is toch nog hiete en Lub hef weinig te meldn. Bin er helaas nao een paar minuutn achter dat ok een fractieveurzitter weinig te meldn hef over et CDA! In et hiele stukkien gien woord heur peti-je. Dat nuumt zich dan een raodscolumn! Et ienigste wat ik nou weete is zo’n beetien alles over et gezin Bosma. En dat zal ok de bedoeligge ewest weezn want een beetien slimme vrouwe pakt een column an umme wat verkapte reclame an te leevern, zoniet veur de politiek dan wel veur et tuusfront!

Goed, in disse column maakn wi-j kennis mit de kiender en mit de oma’s. Die staon centraal in et stukkien. Ok, een beetien over een winkelnde vrouwe mar dat is verwieznd richtink de oma’s. Ondertussn weet ik en iederiene die et les dat Margreet kiender et heel goed maakn en leuke baanties escoord emmn. Dat de jongste bi-j de buurtsuper warkt en dat de oldste graag wat klandizie zol willn in de kapperszaake. Daor hei-j dan moe veur umme in een column een beetien an te geemn dat zie een eegn zaakien hef in de Sluus. Wel heel tactisch en summier vertelt mar voldoende umme tussn de regels deur te begriepn dat zie iets op pootn hef ezet. Goed umskreemn, niet al teveule andacht. Exact zoas verkapte reclame beheurt te weezn: weinig woordn mar mit iene zinne genog veur de interesse die ewekt wördt!

Jongste zussien hef in disse column de beurte en via heur wördt de lezer van alles gewaar. Mien complimentn veur disse meniere van skriemn. Daor is over nao-edacht! Ik bin weer gerust dat in et gezin Bosma alles op rollegies verlöp. Kiender die zölf financieel de boel op örde hebt, veural moe daor trots op is en dat ok de oma’s nog effn een veer in de konte kriegt. Geweldig toch?

De column is net een femilieroman en dat is af en toe ok wel ies prettig. Et trekt miskien iets meer lezers dan een berichien op Facebook? En via oen positie as CDA-er hei-j er mooi mazzel mit aj an de beurte bint!! Helaas zal et nou eempies duurn veur wi-j weer varder kunt leezn over de avontuurn van de femilie Bosma, want ik bin toch wel reuze beni-jd naor pa. Die is helaas vergeetn in et stukkien. En ok al red ie op een skroothoop/old iezer vervoernde vrachtwaagn: dat had nou nét wel mien interesse ehad!

Lood um old iezer za’k mar zeggn... mar twas et wel weerd ewest umme ok dit verkapt en tactisch te brengn. Mwah, wellicht was et iezer mit de haandn breekn?? Zeg et mar... in de vollnde column heurn wi-j vaste weer opni-j over de intriges, relatie en et meer story- of privé gerelateerd gebeurn van een beroemd CDA-gezin.

Margreet... iezer smeedn as et warm is he!

Was getekend, Lambert.

reageren REAGEER | stuur door DOORSTUREN | printen PRINT | VRIJDAG, 20.11.20
Vandaag:
7° | 1°
Meer weer...
Morgen:
7° | 2°


AGENDA
  • Woensdag 25.11.20
  • Donderdag 26.11.20
  • Vrijdag 27.11.20
  • Zaterdag 28.11.20
  • Zondag 29.11.20
  • Maandag 30.11.20
  • Dinsdag 01.12.20
  • Volledige agenda...

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.45377 s