Woensdag 23.09.20 | 22.21 uur

Aflevering 371

De boel op slot in De Sluus?

Stel daj alles onder ien dak hebt mar wel an de verkeerde kaante van de Sluus, dan haj toch ehoopt dat et dak zo’n halve kilometer varderop zol weezn? En aj actieve creasies of ideejn hebt mar disse uutspattingn niet kunt deurgeemn dan wördt et al gauw een passieve bedoenink toch? Oftewel: ik cake al naar je uit mar niet veur zo’n 6 weekn laank!! Da’s te laange uutkiekn. En uutkiekn hoeft in feite niet meer as er wegwarkzaamheedn bint. Dan valt er nogal weinig uut te kiekn.

Tja, valt niet mit as de provincie Overiessel plann hef umme de boel stille te leggn an verkeer. Bereikbaarheid niet of nauwelijks meugelijk vanwege wegwarkzaamheedn. Lekker handig!! Want in et naojaor wil et nog wel ies gebeurn dat et weer iets aandere plann hef dan een strak zunnegien en een kalme wiend. Soms kriej de volle mep an reegnflartn op de kop en over dikke wiendvlaagn mar niet espreukn. Dus altied de fietse griepn …da’s dan veur de echte fantatiekelingn. Niet veur mi-j!! Fietsn is leuk, mar blieve graag dreuge en op de fietse zittn in plaase van veurovergebeugn umme alle wiend uut de zeiln te holln.

Inmiddels emmn een antal prominente Sluzigers van de ondernemerskring et flink duudelijk emaakt dat niemaand hier op zit te wachtn. Weeknlaank en wellicht mit vertragink zölfs nog langer een gesplitst dörp…dat is eigenlijk niet te doen. De boel van elkaare scheidn, dat warkt gewoonweg niet! Ie zult moe mar in de Schans hebt woonn en er niet effn makkelijk naor toe kunn gaon. Ie zult mar van- en naor huus willn nao een daggien hard warkn wat aj aanders in krap 10 minuutn doen. Ie zult mar naor clubs, verienigingn, vergaderingn muttn en daor nog meer tied veur uut muttn trekkn vanwege een (slechts) ummeweg van zo’n 66 kilometer. Dat kan zölfs een klein kiend nog wel anvuuln dat dat niet echt handig is??

Jammer dat plann altied op een taofel uut-edacht wördn in plaase van op de plekke van bestemmink. Kan er niet bi-j he! Miskien dat et deurdringt bi-j ambtenaarn die in de Barsbeek woonn en op maondag erachter koomn dat ze via via naor Hasselt muttn? Gelukkig dan mar dat ok de gemiente skruk van de plann en de uutwarkink op de bevolkink. Dat was toch weer een kleine steun in de rugge mit de wiend mit zogezegd.

Inmiddels een antal gesprekkn en vergaderingn varder en ach ja…t was wellicht toch beter ewest umme eerst ies mit de bevolkink te praotn over hoe en wat. Goh, ja, dit had ok wel aanders ekund en ok nog beter! Gek he, dat mensn, die gien ervarink emm mit provincie wark soms veule helderder kunn naodenkn! Lokale ondernemers die et brein op de goeie plekke emm zittn en et ok nog ies gebruukn, mit of zonder een bak koffie.

Die uutkomstn liekn er op dat er toch skot kump in een wiezigink van de plann mar ik juiche nog mar niet. Zoveule he-k er ok niet mit te doen mar Lambert kump veur Jan en alleman op, ast ienigszins kan helpn umme de kogel deur de karke te kriegn! Ik hoefe allennig niet mien gezichte te laotn zien want op pepier wil dat ok best lukkn.

Onoverdachte- en niet gecommuniceerde plann zittn soms zo dom in elkaare. Oh…ik wilt niet overdag de boel op slot? Nou, dan doen wi-j et wel ’s aomps. Wi-j skoeft mit de plann, de plannink en de uurn. Klaor, probleem op-elöst! Ja doehoeg, ok dan is er volk bi-j ’t pad hè?? Wat dacht ie van ploegndienst die ’s aomps in donker nog ies op de fietse terugge muttn of wel hiel graag naor bedde wilt mar dan eerst nog ies 66 km umme muttn riedn. De electrische deekn zol oververhit raakn!! (en et vrouwgien ok!!) De stumper zit mar te wachtn tot manlief tuus kump umme nog effn dunnegies de dag of de nacht deur te neemn mar die is inmiddels nao laank verzuchtn mar in slaop edommelt.
Nee, bin nog niet helemaolt tevreedn mit de uutkomst. Goed was et niet, ‘t wördt al beter mar kan nog op zien best! Ik laote de heern nog effn zwietn op een nog beter plan want die is er zeer zeker mar veurlopig holt Lambert et op een zwak tot matig front mit hier en daar een kleine oplevink in de plannink. Miskien een tip umme niet ‘alles onder ien wegdek’ te doen? Stel toch daj twee dörpshelftn hebt, dan hei-j wellicht ok twee weghelftn…ideegien?? Varder zeg ik niks meer, bedenk zölf mar wat: ‘ik cake al naar je antwoord uit’!! Beetien actieve creasies zeg mar

En wie an de weg timmert, is al een mooi ende op weg umme op de goeie weg te koomn.

Lambert

reageren REAGEER | stuur door DOORSTUREN | printen PRINT | MAANDAG, 07.09.20
Vandaag:
21° | 8°
Meer weer...
Morgen:
18° | 9°


AGENDA

POLL

  • De coronacrisis vraagt het uiterste van de Nederlandse bevolking. We moeten er alles aan doen om verspreiding van het virus te stoppen.
 JA
 Maatregelen zijn niet streng genoeg
 De maatregelen gaan (veel) te ver
 Kabinet moet bereid zijn nog meer uit de kast te halen om Nederland door de coronacrisis te loodsen

TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?
Gemeente Zwartewaterland
www.zwartewaterland.nl
Informatie voor burgers en ondernemers over het coronavirus

advertentie
advertentie
0.34062 s