Zaterdag 22.02.20 | 17.31 uur

Aflevering 354

'Consumindern'

Ja…da’s wel effn een dingegien!! Lambert zit in tweestried. Ik mut toegeemn dat dit wel eempies een lastig geval van consequent denkn wördt. An de iene kaante steun ik de boer en stao ik gigantisch achter hun stakingsplann umme zodoende sympathie te kweekn veur hun leemswark en leemsdoel mar an de aandere kaante hol ik ok verrekte graag van een lekker mals stukkien vleis mit de Karstdaagn! Tja, wat is wies? Ik bin niet consequent genog vrees ik in disse kwestie nou et er op an kump.

Umme Lub nou de straote op te stuurn veur de 18e december umme vleis in te slaon as et nog kan…dan is et inmiddels zo old en taoj as Sunteklaos zien konte eer et Karst is. Nee, ik mut toch echt wel een mals stukkien op mien börd, zo’n vars stukkien biefstuk waor et bloed nog deur henne siepelt. En dan een sausien waor aj de vingers bi-j aof likt… Da’s puur genietn!

An de iene kaante begriep ik de boern best dat et miens’ is mar an de aandere kaante is disse koomde actie mede gericht op ons, burgers, die juust zo’n begrip haddn veur de veurgaonde actie. Wellicht zakt die sympathie en empathie veur de boern hierdeur en bint ze varder van huus dan zie zolln willn. Zo gauw as iemaand zölf een beetien de dupe dreigt te wördn van iets, dan ist daon! Die anhanger haokt nou finaol aof.

As ik nog wat jonger ewest zol weezn, ha-k geheid mit de trekker naor Den Haag egaon. Absoluut goeie actie ewest umme mit zo’n gevaorte zo’n stuk die kaante op te kacheln!! En ik hadde et er veur over ehad umme mit een gebreukn rugge en mit de oogn krange in de kop van muuj-igheid zo’n rit vol te holln. Al hadde et mi-j een antal daagn ekost umme mien lichem weer op gaank te kriegn…ha-k mar ietsies jonger ewest!

In hoevarre zal een warkgever die zien karstpakket lat vulln as eindejaorsattentie dit in beskouwink neemn? Karstpakket eerder anlevern of een vegetarische variant overweegn? Of helemaol gien karstpakket meer geemn en gewoon een duit in t zakkien doen en zuukt et zölf mar uut-kedoogien?

Lastig…de hamstermaond is in volle gaank en et gehamster wördt nou een keiharde actie gericht op de beveurraodink van winkels. Veur mi-j miskien wel handig want die overvolle skappn mak er et niet vaake makkelijker op umme te kiezn. Mit minder sneller kiezn zoda-k vlot weer fut kan uut zo’n supermarkt. Blef staon dat ik zonder mien malse stukkien biefstuk de winkel uut gao. En dat is dan weer minder interessant!

De diepvries ies onder haandn neemn en kiekn wat daor nog zo’n beetien in leg?? Ooit echt ies goed op-eskoont en miskien is daor nog een verlaotn stuk vleis bliemn liggn van een veurig karstpakket? Tja, zal wel muttn he? Ie weet wel hoe dat gaot: op et moment van invriezn gien tekst erbi-j skriemn wat in welk zakkien zit. Altied weer een flinke verrassink wat ontdeu-jt iniens teveurskien kump. Vaake de pech dat et een sudder/stooflappien betreft in plaase van een snel stukkien snitzel van krap 8 minuutn.

Bin er veurlopig nog niet over uut! Et blef een dingegien.

Pannenkoekn zonder spek op 1e Karstdag en gruuntesoep zonder balln op 2e Karstdag. Ach ja, consumindern dan maar.

reageren REAGEER | stuur door DOORSTUREN | printen PRINT | WOENSDAG, 11.12.19
Naam afzender
E-mailadres ontvanger


Vandaag:
8° | 5°
Meer weer...
Morgen:
8° | 5°


AGENDA
TEKSTADVERTENTIES
Gevonden en verloren?!
www.zwartewaterland.nl
Meld, zoek en vind uw verloren en gevonden voorwerpen!
Zwartewaterland Onderneemt
www.zwartewaterland.nl
Waar kunnen we u mee helpen?

advertentie
advertentie
0.30267 s