Dinsdag 24.05.22 | 15.13 uur

RSS | Mobiel | Laatste 24 uur | Tip de redactie| | |

Aflevering 380

Leste column. Goed gaon!

Ik hadde nog dit, ik hadde nog dat...

Maar ja, dat gemieter mit die tiedsdruk. Winkeln onder tiedsdruk. In nog gien tien minuutn deur een winkel renn en vliegn umme datgiene te griepn wat aj wolt. Gien reddn an toch? Online bestelln en vervolgns nao vier uure et pakkettien ophaaln. Man, dat is gien leemn!

En zo leemn wi-j voort. Leemn wi-j voort onder die enorme tiedsdruk die er altied maar heerst.
En dus wördt et nou mar ies tied umme er mit te stoppn. Stoppn umdat die tiedsdruk constant anwezig is en een mense opslokt. Et is niet meer bi-j te holln!

Lambert is onderhaand te old umme disse wereld nog bi-j te sloffn.

Mar eigenlijk is Lambert niet te old umme nog jaorn columnist te weezn. Skriemn is niet an tied gebundn. En de brein achter Lambert is ok niet te old umme nog jaorn te bliemn skriemn. Mar de tiedsdruk die er nou is, bepaald allennig dat dit de leste column is.

Lieve mensn, Lambert…een olde keerl, een zeur, een chagrijn, een mauwerd, een typisch geval van mostern en moppern. Mar ok een keerl mit een goed harte, een gevuulige en serieuze kaante.

Körtumme: een warkelijk gewoon daags mense, zoas iederiene. Mit zien foutn en mit zien streekn. Zien kiek op et leemn en dat uutgedrukt op pepier. Soms keihard, soms diepzinnig mar ach…iets van oe aofskriemn umdat et oe hooge zit of dwars zit, dat lucht ok weer op.

Et gao jullie allemaole goed, heb elkaare lief en pas goed op mekaare. Et leemn is soms te kört umme te beseffn waor etin feite echt umme drei-jt.

Goed gaon!!

Lambert